Статут Великого Княжества Литовского 1588 года

Подождите немного. Документ загружается.

Статут Великого княжества Литовского 1588 года [Электрон. ресурс]

Подг. О.Лицкевич. - Мн., 2002-2003.

http://starbel.narod.ru/statut1588.htm

Артыкулъ 37.

О установенью черезъ воеводъ, старостъ судовыхъ врядников ихъ судовыхъ

кгродскихъ и о довоженью з ними справедливости.

Уставуемъ, ижъ воеводове и старостове судовые мають зособна кождый з нихъ на вряде

своемъ выбрати и на судъ засадити наместника албо подъстаростего, судью замъкового и

писара, людей добрихъ, цнотливых, годныхъ, в праве и писма руского умеетных

шляхътичовъ, в томъ же поветЪ оселыхъ и родичовъ того панства, великого князства

литовъского, которие, присегу вчинивъши ротою судьи земъского, а писаръ ротою писара

земъского, а посполу вси три зуполный судъ заседъши, мають и моцъ мети будуть судити

и справовати вси речи судовые, замку або двору нашому належачие. А которий бы с тыхъ

на вряде былъ неоселый и неприсяглый, а воевода, староста суду зуполного дати не хотел,

тогды сторона не повинъна будеть передъ такимъ судомъ отказывати. А тым неданьемъ

оселого и зуполного вряду, если бы се кому проволока або якое уближенье праву стало,

тогды воеводове, старостове судовые, кгды о то будуть передъ суд головный позваный

[так!], повинъни будуть сами укривжоному шкоду и наклады за доводомъ оправити и

заплатити. А предъсе неоселых на врядехъ мети не мають, подъ страченьемъ того уряду з

выроку нашого, г[о]с[по]д[а]ръского, кгды о то до насъ позванъ будеть. А естли бы се от

оселого враду што недозреньемъ на томъ уряде и въ справе ихъ поблудило, а зъ статутомъ

бы се права посполитого не згожало и што бы се стороне которой с кривдою от нихъ

видело, тогды сторона жалобная в той кривде своей маеть от вряду земъского того ж

повету листъ упоминалный взяти, абы панъ воевода або староста судовый в таковой речи

справедливость з урядомъ своим ей учинилъ. И тотъ листъ упоминалный маеть быти

врядовне положонъ такимъ обычаемъ, яко и о инъшихъ листехъ врядовыхъ покладанью

естъ в семъ статуте описано. В том же замъку або дворе нашомъ, где хто естъ воеводою

або старостою, а от положенья того листу упоминалного меновите за чотыри недели маеть

панъ воевода або староста, будь самъ прибывши особою своею до того вряду своего або

на местъце свое, кого его воля будеть, засадившы, и черезъ тыхъ особъ засажоныхъ

жалобнику справедливости з урядомъ своимъ учинити. А где бы самъ панъ воевода або

староста судовый або от нихъ на то особы высажоные справедливости з урядомъ таковым

на тотъ рокъ, веръху мененый, не учинили, тогды о то стороне жалобной волно будеть

позвати таковый врядъ кгродский до суду головного трибунальского, покладаючи позовъ

такежъ на местцу судовомъ воеводъства або староства ихъ. А хотя бы панове воеводове и

старостове сами або тые особы, которые от нихъ на то высажоны будуть, чинили

справедливость, але бы се стороне жалобной розсудокъ и сказанье ихъ не водлугъ права

видело, тогды той стороне жалобной волно будеть в той мере до суду головного

трибунальского апелевати и отозватисе. А в томъ часе до очевистое росправы, яко з

урядомъ кгродъскимъ, такъ же и зъ самыми воеводами и старостами судовыми никоторая

отправа стороне чинена не маеть быти.

Артыкулъ 38.

Абы судъ кгродъский рочковъ не омешкивалъ, хотечи то мети, абы справедливость

без отволоки кождому укривжоному доходила

Уставуемъ, абы воеводове, старостове судовые, а в небытности ихъ, ино врядники ихъ

судовые рочковъ судовыхъ кгродъских под тою жъ присегою своею, на врядъ ихъ

учиненою, не омешкивали, але ихъ кождого м[е]с[е]ца отправовали. А который бы з

урядниковъ кгродъских на которые рочки кгродъские за хоробою своею або за потребами

своими властными на тыхъ же рочкохъ або рокохъ земъскихъ, подъ тымъ часомъ

отправуючихъ, в ыньшомъ повете припалыми, на рочки не прибылъ, тогды на другихъ

Статут Великого княжества Литовского 1588 года [Электрон. ресурс]

Подг. О.Лицкевич. - Мн., 2002-2003.

http://starbel.narod.ru/statut1588.htm

рокохъ винен будеть передъ шляхтою поведити, подъ тою жъ присегою, на врядъ его

учиненою, ижъ подъ часомъ тыхъ рочковъ, на которые не прибылъ, правдиве хор былъ

або свои властные потребы правные на рочкохъ кгродъскихъ або рокохъ земъскихъ въ

иншомъ повете мелъ. А где бы которий с тых врядниковъ кгродъскихъ без правдивое

обложное хоробы, або властное пилное потребы своее в другомъ повете на рокохъ не

маючи, рочковъ судовыхъ омешкалъ або неслушне розоръвалъ, а то бы се до трехъ разовъ

на него показало, таковый врядъ свой тратить. А воеводове, старостове повинни будуть

такого непильного и недбалого врядника своего, кгды то на него правне доведено будеть,

с того вряду зложити, а на тое местъце инъшого уставити.

Артыкулъ 39.

О кривдахъ в речахъ крвавыхъ, суду кгродскому належачихъ, кому бы се деяли от

воеводъ, старостъ судовыхъ и ихъ врядниковъ кгродскихъ судовыхъ зъ ихъ

оселостей.

Постерегаючи мы, г[о]с[по]д[а]ръ, того, абы всимъ подданым нашимъ однакая и ровная

справедливость одному з другимъ деялася, уставуемъ, ижъ где бы хто з воеводъ, старостъ

[в оригинале: «староствъ»] судовыхъ албо зъ их врядниковъ судовыхъ кгродскихъ,

наместникъ або подстаростий, будь тежъ судья або писаръ, маючи именья в том же

повете, где они суть врядниками судовыми, а с тых такихъ именей своих кому якую

кривду в речахъ крвавыхъ и што кгродскому суду судит[ь] прислухаеть, будь сами або их

врядники, слуги, бояре и подданые учинили, а они бы зъ своихъ слугъ подъданыхъ

справедливости о то укривжоному вделати не хотели, тогды воеводове, старостове сами о

то мають быти позывани с тых именей своихъ до инъшого близшого вряду и суду

кгродъского того повету, с которимъ будеть о границу з оным другимъ поветомъ, в

которомъ ся што будеть стало, кладучи позвы через возного того жъ повету, с которого и

позвы выйдуть, на томъ именью ихъ, с которого се кривда дееть. А врядъниковъ ихъ

судовых, естли жалобная сторона не схочеть до воеводы и старосты позвати, тогды волно

ей будеть позвати такожъ, яко вышей описано, до другого прилеглого суду кгродъского. А

воеводове, старостове и ихъ врядники в ономъ другомъ повете, не вымовляючисе

вызваньемъ з своего належного повету, повинъни будуть передъ тымъ другимъ урядомъ

за позвы становитисе и росправу в такихъ речахъ водлугъ права приймовати. А зостанут

ли в чомъ с права виньни, тому тотъ же врядъ, которий судилъ, и отправу на нихъ и

оселостяхъ ихъ водлугъ порадъку сего статуту чинити маеть. Оповеданье тежъ и

записыванье тыхъ кривдъ и всякихъ иныхъ поступковъ правныхъ маеть быти чинено, где

жалобная сторона похочеть - або в том же кгроде того повету, где се што станеть, або на

том же другомъ уряде, до которого и позван[ь]е в семъ артыкуле указано.

Артыкулъ 40.

О поправенью облуженья або сказни неправъное вряду кгродъского и земъского, за

нестаньемъ стороны позваное учиненое, и о недопущенье апеляцыи, гдЪ о то врядъ

позывати.

Тежъ уставуемъ: где бы се то притрафило, жебы врядъ кгродъский або земъский в

нестанью стороны позваное, за упорнымъ сказанемъ своимъ, неправне або в такой речи,

которая бы суду его не належала, далъ кому отправу, увезанье в ыменье [в оригинале: «в

ыйменье»] або в который колвекъ кгрунътъ, або бы очевисте сторонамъ, у суду стоячимъ,

в недопущенью апеляцый сторона которая собе кривду от вряду менила, тогды о такие

речи судъ земъский, толко судья а подъсудокъ мають быти позвани на рокъ завитый

пЪредъ судъ головный. А о кривду в сказанью судовомъ писаръ такъ земъский, яко

Статут Великого княжества Литовского 1588 года [Электрон. ресурс]

Подг. О.Лицкевич. - Мн., 2002-2003.

http://starbel.narod.ru/statut1588.htm

кгродский позываны быти не мають и за судъ отказывати не будут повинъни, кгды жъ они

моци до чиненья выроковъ не мають. А хотя бы были и позвани, тогды становитисе не

будуть повинны, одъно ж где бы который писаръ в омылце або недоложен[ь]ю якого

писан[ь]я был обвинен, таковый о то такежъ позыванъ быти может до суду головного. А

вряд кгродский в таковом обвинен[ь]ю мает быти ку росправе притягиван до того суду и

тым порядком, яко о том вышей в арътыкуле сего жъ розделу естъ описано. А естли бы се

з очивистого мовенья стороны жалобное з урядомъ тое неправное сказанье которого вряду

показало, тогды таковая сказнь маеть быти поднесена и на сторону отложона. И такъ

укривжоному маеть быти вывезанье дано и оное именье або кгрунтъ отсужоный зася ему

приверъненъ. А тому, кому за токовымъ [так!] неслушнымъ сказаньемъ увязанье было

дано знову волное мовенье з стороною, естли онъ похочеть, маеть быти заховано. Также и

тому, с чюего [так!] держанья именье вынявши, тому, хто неслушне право перевелъ,

подано о шкоды, которие се стали за держанья его, у суду належного зъ стороною волное

мовенье будеть. А к тому стороне той, противъ которой первей сказанье было вчинено и

увязанье бы в маетность его дано, виненъ будеть такий врядъ, которые позвани и в томъ

винъными найдены будуть, вины дванадцать рублей грошей там же у суду заплатити.

Пакли ж бы з розъсудку суду головного противъ врядниковъ земъскихъ або кгродъскихъ

або тежъ з суду воеводъ, старостъ судовыхъ противъ ихъ врядниковъ нашлосе то, же

сказнь врядовая слушне через нихъ вчинена, тогды тотъ упоръный, который судъ рушилъ

и ку волоките невинъне приводилъ, маеть вины тымъ врядникомъ судовымъ, которые от

него будуть позвани, дванадъцать рублей грошей там же у суду заплатити. А судъ ихъ

правный ку выконанью своему, водлугъ права привожонъ быти маеть. Ведъ же от

воеводъ, старостъ и в таковой речы апелевати до суду головного вольно будеть.

Артыкулъ 41.

О злый переводъ права через сторону и гдЪ о то позвати.

Хто бы противъ кого право якое такъ у суду земъского, яко и кгродъского и в которого

кольвекъ иного вряду якимъ форътелемъ або омылъкою якою справою заочне, за

нестаньемъ стороны позваное, перевелъ, будь рокъ який неправдивый, змышленый в

неведомости стороны противное утворившы, або на якую речъ за записы якими

змышлеными, неправдивыми, сказанье врядовое одеръжавши, тогды тотъ, противъ кому

сказанье выйдеть, можеть о такий злый а неправдивый переводъ права до того жъ вряду,

передъ которимъ будеть право переведено, сторону противную позвати. И кгды се в томъ

виннымъ с права окажеть, тогды тотъ судъ перший маеть быти подънесенъ и внивечъ

оберненъ. А тотъ, хто змышленымъ обычаемъ право переводилъ, за тую вину маеть седети

в замку албо в дворе нашомъ судовомъ дванадъцать недель, а стороне своей противной

дванадъцать рублей грошей заплатити. А то в речахъ такихъ, где горъла не заслужить.

Ведъ же естли бы се на томъ праве оказалъ який фалшъ и подъступокъ значный, явный, за

што бы слушнЪ водле права мелъ быти горъломъ каранъ, тогды такового вряд маеть

судити, сказовати и карати водлугъ сего права посполитого и выступку его. Пакли ж бы

тотъ, хто позоветь о злый переводъ права, тое жалобы своей не довелъ, але бы тое

позванье чинилъ ку зволоце справедливости, а тое бы ся противное стороны поступокъ

перъший слушный правный оказалъ, тогды сам тотъ жалобникъ оной противъной стороне

своей также вины дванадъцать рублей грошей маеть заплатити и на замку або в дворе

нашомъ дванадъцать недель седети. А оному суду перъвшому маеть отправа быти чинена

водлугъ сказанья и права посполитого. А гдЪ бы хто, о злый переводъ права припозвавши

в речахъ крвавых, гдЪ пойдеть о горъло, менилъ то, же ему о позве ведомость не дошла

была, тогды маеть на томъ присегнути, же его ведомость о позве не дошла, и по присязе

Статут Великого княжества Литовского 1588 года [Электрон. ресурс]

Подг. О.Лицкевич. - Мн., 2002-2003.

http://starbel.narod.ru/statut1588.htm

от перъвшого сказанья воленъ будеть, а на речъ самую тамъ же заразомъ отказовати

маеть. А то се маеть розумети о заочномъ положенью позву.

Артыкулъ 42.

Роки завитые в которыхъ речахъ мають быти складаны у суду земъского.

Напервей, хто кого позоветь о заставу ку бранью п[е]н[е]зей, хотя сторона позваная не

станеть на роки первшие, тогды предъсе судъ не маеть откладати на далшие другие роки.

Але на перъшомъ року яко на завитомъ, первой выслухавши доводу стороны поводовое,

яко о томъ нижей описано, тожъ маеть всказанье учинити и въвезанье стороне поводовой

дати, взявши от него п[е]н[е]зи до вряду, и при книгахъ судовыхъ мають быти положены

до того часу, ажъ сторона позваная ихъ озметь. Другое: о выбитье з дому зъ спокойного

мешканья и отнятье именья, людей и всякихъ кгрунътовъ, где бы омешкалъ або не хотелъ

о то до кгроду позвати. ТретЪе: о всякую речъ сужоную рокъ завитый за перъвшим

позвомъ. Четвертое: о слугу якого жъ кольвекъ стану або чоловека, або челядина

домового, который бы от пана своего такъ шкоду учинивши, яко и не зашкодивши, прочъ

утекъ. Пятое: о мыто, о мостовое, о гребелное, торговое и перевозы князские, паньские и

шляхетъские, также и всякихъ становъ, естли хто на комъ або на подданомъ чиемъ мыто

неслушне возметь або шкоду якую учинить. Шостое: хто бы езами або млынами, гатми,

мостами реки портовые гамовалъ, проходу або дороги слушное не вчинивши, а за тымъ

бы се шкода кому стала. Семое: естли ся хто кому добровольне описалъ и рокъ в листе

своемъ ознаймил, а не учинилъ бы тому досыть. Осмое: о розделъ именей и маетности

всякое межи брат[ь]ею и сестрами, и близъкими, также и з опекунами детемъ лЪтъ

дорослымъ, за первшыми позвы маеть быти рокъ завитый. Девятое: на поручника и на

приказъцу. А поручнику и приказъцы зъ истъцомъ, по комъ ручилъ, маеть быти завитый

рокъ. Десятое: о выеханье на кгрунтъ вряду подкоморъского и комисаръского.

Одинадъцатое: о обельживость возныхъ на справе уряду ихъ. Дванадъцатое: о кривды

подъданыхъ г[о]с[по]д[а]ръскихъ от шляхты, гдЪ права майдебуръского нетъ.

ТретЪенадъцать: о вдове утратъной, на вдовимъ столцу будучой. Четвертоенадъцать: о

вины нашы, г[о]с[по]д[а]ръские, врядовые и сторонамъ належачие. Пятоенадъцать: о

головщины людей стану простого. Шеснадъцатое: о бранье пересудовъ и потуремного

надъ уставу статутовую через кн[я]зей, пановъ, шляхъту и врядниковъ ихъ и о вину на

подъкоморого. Семнадъцатое: о грабежъ вшелякий и о заплату испаши. Осмънадъцатое:

хто бы под часомъ роковъ який збытокъ учинилъ и, не росправивъшисе, уехалъ.

Деветнадъцатое: о кривды от врядниковъ г[о]с[по]д[а]ръскихъ зъ их врядовъ, одно не о

добра, столу нашому належачихъ, и о оборону ихъ, яко о томъ въ инших арътыкулехъ естъ

описано. Двадъцатое: о полюбовъный судъ. Двадъцать перъвое: о выбитье або отънятье з

деръжанья по увезанью. Двадъцать второе: о загамованье листовъ отвороныхъ.

Двадъцат[ь] третЪе: о кривду подъ часомъ военънымъ вчиненую. Двадъцат[ь] четверътое:

о дохоженье долъгов по змеръломъ должнику на именьяхъ спадъковых оного змерълого

водлугъ арътыкулу осмънадъцатого в розделе семомъ. Двадъцать пятое: о навезку за

выводомъ шляхетъства водлугъ арътыкулу пятьдесятого в розделе одинънадъцатомъ. А в

тыхъ всихъ речахъ, тымъ рокомъ завитымъ подъданыхъ, в семъ артыкуле и тежъ въ

иншыхъ арътыкулехъ сего статуту описаныхъ, за позвы земъскими рокъ маеть трвати,

водле давного обычаю права, до третего дня такъ позваной, яко и поводовой стороне. А

гдЪ бы которая сторона через три дни за воланьемъ возного безъ причинъ правныхъ, в

семъ статуте замероныхъ, не стала, тогды вжо в той речи, на позве описаной, упадаеть и

вечне то стратить, абовемъ моцъ роковъ завитыхъ у суду земъского и кгродъского такую

хочемъ мети, ижъ кождого стану чоловекъ, будучи позваный на рокъ завитый, не можеть

се на року завитомъ большими справами въ инъшихъ поветехъ и никоторими иными

Статут Великого княжества Литовского 1588 года [Электрон. ресурс]

Подг. О.Лицкевич. - Мн., 2002-2003.

http://starbel.narod.ru/statut1588.htm

причынами вымовляти, окромъ трехъ причынъ, то естъ хоробы обложоное и послуги

нашое, г[о]с[по]д[а]ръское, земское, в семъ статуте менованое; а третяя причина: естли бы

се коли то трафило, жебы одна особа в речахъ крвавыхъ до двухъ судовъ кгродъскихъ

была позвана, яко о томъ въ артыкуле двадъцать семомъ сего жъ розделу ширей ест

описано. Ведъ же и тая обмова противъ року завитому толко на одныхъ рокохъ и за

одными первшыми позвы маеть быти допущона, а на другихъ рокох або рочкохъ

кгродъскихъ вжо се и тыми причинами вымовляти нихто не будеть мочи, але албо самъ

албо черезъ умоцованого у суду становитисе и росправити повинен будеть, вынявши то,

естли бы хто, будучи отосланъ на послугу нашу, г[о]с[по]д[а]ръскую, земъскую зъ

границъ паньствъ нашихъ, не могъ се оттоль боръздо звернути, таковому до зверъненья с

послуги нашое и земъское фолькга в праве чинена быти маеть водле сего статуту. А гдЪ

бы тежъ сторона позваная без причын правныхъ, вышей мененыхъ, не стала, таковая речъ

свою, о што позвана, тратить, и суд на таковомъ за доводомъ правнымъ то, што в позве

описано, сказати маеть. Такъ тежъ и поводовая сторона, позвавъшы на рокъ завитый, сама

не стала и року своего не пилновала, таковая также речъ свою, о што позвала, вечне

тратить.

Артыкулъ 43.

О позвехъ наших земскихъ и кгродъскихъ, и якъ долъго трвати мають.

Уставуемъ тежъ, ижъ кождые позвы уряду земского и кгродъского, такъ тые, которыми

бы не позвано, и яко и тые, которыми бы позвано, далей трвати и в моцы своей быти не

мають, толко на одны роки судовые земъские албо рочки кгродъские, передъ которыми

ихъ взято. И для того тые роки земские и рочки кгродъские, на которые се тыми позвы

позывати будуть, в оныхъ позвехъ меновите мають быть описаны, окромъ того, естли бы

по заложенью позвовъ роки земские або рочки кгродские сполъзли не сужоные за войною

або поветреемъ, або за иншыми якими с часомъ припалыми причинами, о чомъ естъ

нижей въ артыкулехъ сего жъ розъделу описано.

Артыкулъ 44.

Хто бы кого от суду належного до иного повету албо вряду и суду вызвалъ.

Уставуемъ, хотечи мети, абы нихто никого от суду належного до другого вряду и суду, то

естъ яко о речи, земскому суду належачие, до вряду кгродского, такъ о речы вынятые на

кгродский судъ, до земъского вряду и тежъ с повету в ынший поветъ, ани до

комисаръского, подкоморъского и жадного иньшого суду неприналежного, также ани

перед насъ, г[о]с[по]д[а]ра, ани перед судъ головный надъ сесь статутъ и порядокъ его и

тежъ надъ артыкулы оного головного суду постановеные не смелъ вызывати. А хто бы то

учинил, а до инъшого вряду и суду належного кого вызвалъ, тогды позваный толко

ведомость вряду тому, до которого будеть позванъ, о таковомъ непорядномъ и

неслушномъ позванью самъ або черезъ посланъца своего, на то умоцованого, маеть дати и

обмову в томъ учинити. А таковыхъ позвовъ послушонъ быти и стороне за ними

отказывати не будеть повиненъ, але еще тотъ, хто таковые позвы озметь и ими позоветь,

за то, же мимо судъ свой належный смелъ то учинити, маеть заплатити вины тому вряду,

отъ которого вызвалъ, копу грошей, а стороне - три рубли грошей. А то в тотъ часъ, кгды

бы жалобникъ повторЪ о тую жъ речъ позвалъ и тые вины тотъ врядъ належный мает собе

и стороне отъправити заразомъ, не позываючи о то, где бы оселый в томъ же повете былъ,

тогды на оселости его. А естли бы оселости в ономъ повете не мелъ, тогды на маетности

его рухомой. Пакли ж бы жалобникъ, позвавъши до суду належного, самъ не сталъ, а

позваный становилсе, тогды предъсе позваному волно будеть о тую вину оного жалобника

Статут Великого княжества Литовского 1588 года [Электрон. ресурс]

Подг. О.Лицкевич. - Мн., 2002-2003.

http://starbel.narod.ru/statut1588.htm

позвати на рокъ завитый до суду земъского з оселости его, в которомъ колвекъ повете

мети ее будеть. А врядъ винЪнъ будеть ему тую вину сказати и на оселости его отправити,

окромъ того, хто бы записомъ своимъ листомъ властнымъ, отступуючи повету албо

которого суду своего належного, въ який иншый судъ доброволне ся вдалъ и опроч тое

причины, которая ув ыншихъ артыкулехъ допущаеть с повету вызвати.

Артыкулъ 45.

О таковыхъ, которые бы, не маючи в которомъ поветЪ оселости, другого оселого

позвалъ, а шло бы имъ обудвумъ сторонамъ о одну речъ, такъже и о томъ, который

нигде оселости не маеть.

Тежъ уставуемъ: коли бы хто, не маючи в которомъ поветЪ оселости, другого кого там

оселого позвал, а шло бы имъ обудвумъ сторонамъ о одну речъ, тогды тотъ позваный

оселый можеть заразомъ не отповедати и в право сЪ не вдавати, аж бы се тежъ онъ

противникъ его неоселый тамъ поддалъ и обвезалъсе листомъ своимъ и сознаньемъ

перЪдъ врядомъ ему в томъ, гдЪ о одну речъ идеть, тамъ же у его поветЪ отповедати и

усправедливятися [так!], не отзываючисе и не беручи собЪ до суду и повету своего. А

кгды ся поддасть под тое и обвяжеть, тогды предъсЪ оный позваный за тыми жъ позвы на

оный же часъ наперЪдъ будеть ему повиненъ усправедливитися. Пакли ж бы тотъ

приеждчый жалобникъ зъ иншого повету, одеръжавшы собе справедливость, а позваному

зася не усправедливившися, прочъ от суду от[ъ]ехалъ, тогды тотъ судъ и сказанье, ему

вчиненое, не маеть быти ему выконывано. А естли бы хто нигдЪ в томъ паньстве,

великомъ князстве литовском, оселости не маючи, оселого в которомъ повете позвалъ, а

позваный бы до него, будь о тую жъ речъ албо о которую иншую дело мелъ, тогды

таковый маеть напередъ по собе паруку оселого в томъ же повете дати, ижъ нигдЪ индей,

одно на томъ же уряде стороне своей противной усправедливятися заразомъ скоро по

своем праве будеть повиненъ. А гдЪ бы по своем праве уехалъ, не росправившисе з

стороною противною, тогъды такежъ сказанье оное перъшое ему вделаное, до

выконан[ь]я привожоно быти не маеть, а речи своее позваный местъцо истъца на

паручнику искати тамъ же заразомъ маеть. А гдЪ бы и поручникъ не росправившисе

уехалъ, тогды з нимъ за позвомъ справедливости доводити собе будеть у суду належного.

Артыкулъ 46.

О рокохъ, которые судья, подъсудокъ и писаръ зъеждчатисе и позваные передъ ними

становитисе повинни, а подъ которымъ часомъ роки сужоны быти не мают.

Тежъ уставуемъ, ижъ суды земъские мають быти трикроть до году, то естъ трои роки

судовые, на которые будуть повинъни судья, подъсудокъ и писаръ на одно местъце в

кождом воеводъстве и повете, а в земли Жомоитъской такъже на местъца певные, судомъ

назначоные, зъеждчатися и тамъ такъ долго мешкати, поки вси справы судовые отсужоны

и сконъчоны быти могуть. А в которомъ повете на двухъ местъцахъ роки земские

отсужованы бывають, тогды и до тыхъ местцъ вряд приехавшы по тому жъ ся около

мешканья на отправу судовъ заховати маеть, яко о томъ вышей в семъ же арътыкуле

описано, прызнаваючи кождому позванью очывистому и заочному рокъ передъ кождыми

роками водле артыкулу осмънадъцатого в сем же разделе. А часъ приеханья всихъ трехъ

урядниковъ на другое местъце судовое от початья роковъ земъскихъ в чотырох неделях. А

позванье и поводъ будуть повиньни перед ними се становити обычаемъ и способы, в

особливыхъ арътыкулех описаными. А роки мають быти сужоные: первшые о светой

тройцы рымского свята и назавт[р]ее ся в понеделокъ почнуть, а другие — ув осень на

день светого Михала рымского свята, и так же се назавтрее почнуть; третие — на день и

Статут Великого княжества Литовского 1588 года [Электрон. ресурс]

Подг. О.Лицкевич. - Мн., 2002-2003.

http://starbel.narod.ru/statut1588.htm

свято трех кролей зиме и так же ся назавтрее почнуть. А потомъ в другом году, также на

день светое тройцы рымского свята назавтрее се почнуть. А суд[ь]я, подсудокъ и писаръ

мають суды справовати и на суде седети кождого дня, кромъ недели, от поранку до

нешпорное годины. А позвы судити порадне з рейстру, не глядечи [так!] на особы а не

фолькгуючи в томъ никому, але который первей уписался в рейстр, тотъ наперЪдъ сужонъ

быти маеть. А ведь же подъ тымъ часомъ роки сужены быти не мають, перъшое: если бы

послуга наша, г[о]с[по]д[а]ръская, земъская, военъная з сойму валного посполитымъ

рушеньемъ была уфалена и листы бы наши военъные зашли, ино для готованья на войну

за шесть недель не мають быти роки сужоны, то естъ перЪдъ часомъ збиранья войска [в

оригинале: «вомска»] зложонымъ, а где бы часъ певный и местъцЪ збиран[ь]я войска в

листехъ наших не было ознаймено, толко о готовость на войну листы высланы были,

тогды предся роки мают быт[ь] сужоны. А кгды бы такъ с тое причины за войною роки

сужоны не были, тогды по войне, на первшихъ рокохъ, водле статуту припалыхъ, мають

ся стороны, знову припозвавшы, росправовать. Другое: естли бы, чого боже уховай, в

которомъ повете поветрее моровое было, а то бы се значне показало, подъ такимъ часомъ

в ономъ повете такъже роки не мають быти сужоны; а по томъ часе, яко поветрее оминеть,

маетъ врядъ судовый земъский в ономъ повете другие роки судовые, в статуте описаные,

близъко припадаючие, судовне, отправовати. А на тыхъ рокохъ мають стороны, знову

припозвавшися, росправовати. То ж ся маеть розумети и [в оригинале второе «о»] о

такихъ рокохъ, которые бы не были сужоны за зейшстемъ з сего света которого врядника

судового. А также где бы ся то трафило, жебы в томъ часе межы роковъ хто с которое

стороны, будь жалобное або позваное, умеръ, тогды с тое причины позовъ маеть быти

отновленъ водлугъ потребы, албо естли бы сторона жалобная сама хотела и при животе

позваного позовъ отменити и на нимъ ся поправити, то ей волно будеть.

Артыкулъ 47.

О суженье роковъ земъскихъ и рочковъ кгродъскихъ подъ часомъ соймов вальныхъ

и о обранью врядника судового в посельстве.

Забегаючи продлуженью непотребному справедливости людъской, уставуемъ, ижъ подъ

часомъ соймовъ вальныхъ роки земские и рочки кгродъские и иные всякие суды

отправованы и сужоны быти мають, одно вынемъшы тыхъ особъ пановъ радъ нашыхъ,

которые бы на съемъ вальный ехали, такъ тежъ которые бы справы судовые, соймови

належачие, передъ нами, г[о]с[по]д[а]ремъ, на сойме мели, будь за мандаты або позвы

нашими дворъными. И тежъ послы с кождого воеводъства и повету и земли Жомоитъское,

будучы на съемъ вальны [так!] от обывателей с поветовъ на соймикахъ обраные и

посланые от судовъ всякихъ, подъ соймомъ волни будут, ажъ поки ся з сойму зверънуть.

Однакъ же кождый такий маеть ся суду и стороне листомъ своимъ отворонымъ с

печат[ь]ю своею и с подъписомъ руки своее, а хто писати не умееть, за печат[ь]ю своею и

з двема печатьми людей сторонъныхъ шляхъты черезъ приятеля або слугу своего

обмовити. А потомъ предъся тот, хто на сойме валномъ при нас, г[о]с[по]д[а]ри, яко ихъ

м[и]л[о]сть панове рада и послове або и инъшые станы, которые справы свои на дворе

нашомъ за мандаты або за позвы маючие будуть, естли бы на первшыхъ рокохъ земъскихъ

або рочкох кгродъскихъ, водлугъ порадъку статутового по ономъ сойме припалыхъ и

судовне отправуючихъ, о бытности своей на сойме або о справахъ своихъ, которие на

сойме валномъ мели и судовне отправованы были, сведецъства на писме с канъцляреи

нашое не показали, тогды за другими позвы на другихъ рокохъ нестанъное платити, а на

речъ самую з стороною росправу прыняти повинъни будуть. А где бы шло о речи,

завитому року подлегълые, в семъ статуте в особливыхъ арътыкулехъ описаные, тогды

врядъ сказанье за тыми ж позвы на другихъ рокохъ, по сойме напервей судовне

Статут Великого княжества Литовского 1588 года [Электрон. ресурс]

Подг. О.Лицкевич. - Мн., 2002-2003.

http://starbel.narod.ru/statut1588.htm

отправуючихъ, стороне поводовой кромъ доводу учинити и отправу черезъ возного, яко

на непослушного, вделати маеть. Пакли жъ бы которого зъ урядниковъ земъскихъ на

соймику посломъ на съемъ великий валный обрано, тогды на местъце такого врядника, в

посельстве обраного, мають заразъ на томъ же соймику або на рокохъ земъских шляхъта,

рицеръство посполъ з урядниками, тамъ на соймикъ або на роки прибылыми, иншого кого

шляхътича оселого, спросталого, ку отправованью тыхъ роковъ, подъ соймомъ

прыпадаючыхъ, до зверъненья того врядника обрати. Который обраный шляхтичъ,

присягнувшы на справедливый судъ, будет мети моцъ зъ иншими позосталыми врядники

тые роки судити и отправовати. А гдЪ бы не хотелъ присягнути, тогды роки сужоны быти

не мають. Где бы тежъ обранъ былъ посломъ которий врядникъ судовый кгродъский, на

того местъце воевода або староста маеть иншого шляхътича оселого засадити и того

листомъ своимъ шляхъте на рочкох ознаймити. А тотъ обраный такежъ виненъ будет на

справедливый судъ присягнути.

Артыкулъ 48.

Которымъ бы се деяли якие кривды от врядниковъ, слугъ, бояръ и подданыхъ чиихъ

кольвекъ.

Уставуемъ: естли бы кому от чиихъ колвекъ врядниковъ, слугъ, бояръ и подданыхъ якие

кривды, шкоды в речахъ поточныхъ, кромя забранья кгрунтовъ, деялися, тогды маеть

сторона жалобливая взяти от писара земского позвы, в которыхъ, описавшы всю жалобу

свою, того докладат[ь], абы ему с тыми обвинеными рокъ праву зложил и

справедливост[ь] вделалъ. А гдЪ бы року зложит[ь] и справедливости вделати не хотелъ,

абы за тыми жъ позвы ку праву самъ сталъ и тых, на кого жалоба идеть, у права

поставилъ. А то в тыхъ речахъ, которые земъскому суду належать, от земъства, а што

кгродскому суду, то также з кгроду позвы таковые браны быти мають, и с такими

кождыми позвы маеть укривжоный ехати або слати з вознымъ до того пана, от чиего

врядника, бояръ, слугъ и людей кривъды кому ся деяти будуть, справедливости просечи.

А кривды и шкодъ своихъ рейстръ дати маеть, звлаща если бы се на самомъ позве

меновитЪ не доложилъ. А гдЪ бы самыхъ пановъ в тыхъ именьяхъ ихъ, с которыхъ кривда

деется, не было, ино до врядниковъ ихъ, абы они на слугъ, бояръ и людей пана своего

справедливость чинили. А где бы возного с такимъ позвомъ у дворъ не пущоно або и

пустившы в дворъ, панъ самъ, або врядникъ албо тивунъ, не оказали бы се возному, тогды

оный позовъ маеть быти черезъ возного покладанъ на именью томъ, с которого ся кривда

дееть, тымъ порядкомъ, яко о покладан[ь]ю позвовъ естъ доложоно. А рокъ праву за

такими позвы не маеть быти дальшый от нихъ покладанъ, одно чотыри недели от поданья

або положенья того позву. И на томъ же именью, где позовъ будеть положонъ,

справедливость чинена быти маеть. Естли бы тежъ сторона тая, которая такимъ позвомъ

обнесена будеть, похотела чинить справедливость стороне и ближей, нижли за чотыри

недели, маеть черезъ возного листомъ своимъ отворонымъ сторону жалобную обослати,

упевняючы его в томъ, ижъ хочеть ему справедливость учынити водле оного позву. Ведъ

же не ближей толко за две недели передъ оным рокомъ тое обосланье чынено быть маеть.

И будет ли хто за таковымъ позвомъ справедливости на именью своемъ самъ панъ або его

врядникъ чинити, тогды того суда своего маеть стороне своей листъ свой судовый подъ

печатью своею и под печатьми людей сторонъных и возного, которые бы на томъ праве

были, того жъ дня а надалей дозавтрея по сконченью права дати. А где бы листу судового

хто не далъ албо хотя бы и далъ, а сторона не хотела бы в онъ часъ заразомъ на томъ суде

албо и листе судовомъ перестати, менечи собе уближенье в суде албо в писанью листу

судового, тогды возный, которий на такомъ праве будеть, маеть то до книгъ сознати, якъ

ся тое право точило, и тымъ ся сторона поводовая у права подъпирати маеть. А естли жъ

Статут Великого княжества Литовского 1588 года [Электрон. ресурс]

Подг. О.Лицкевич. - Мн., 2002-2003.

http://starbel.narod.ru/statut1588.htm

бы яко панове сами, такъ и врядники ихъ, очевисте будучы такъ упомнени, року праву

зложыти и справедливости учинити не хотели, тогды за онымъ же позвомъ повиненъ

будеть на рокохъ становитисе и в томъ се усправедливити. А пакли бы заочне тотъ позовъ

на именью положонъ былъ, тогъды сторона жалобная маеть от положенья позву за чотыри

недели, хотя бы и рокъ не былъ зложонъ, до того именья ку довоженыо собе

справедливости ехати албо кого з моцъю от себе ку праву слати. Если жъ бы тотъ панъ

албо врядникъ, тивунъ его, на тотъ рокъ справедливости не учинилъ, ино сторона

позваная маеть о речи, земскому суду належачые, у земского суду, а о речы,

прислухаючые на судъ кгродъский, у вряду кгродъского становити, и тыхъ, от кого кому

крывды будуть деяти, поставити. А ведъ же в небытности того самого пана, с чиего

имен[ь]я крывда се дееть в томъ именьи, не маеть его сторона жалобливая нигде инде

искати, але на том же именьи, с которого се кривда дееть, позвы таковые положити маеть.

А врядъ, передъ которий се то приточить, будеть повиненъ межи ними того досмотрети и

справедливость учинити. А где бы позваный самъ або черезъ умоцованого своего стати и

тыхъ врядниковъ, бояр, слугъ и людей своихъ, кому вина дана, поставити не хотелъ,

тогъды судъ повиненъ ку таковымъ непослушнымъ заховатисе водлугъ сего статуту. А

естли бы тотъ панъ и хто жъ кольвекъ самъ або врядники ихъ рокъ праву зложили, а на

томъ року зложономъ або тежъ за заочнымъ положеньемъ позву на року в чотырохъ

неделяхъ припаломъ, вышей тутъ менованомъ, справедливости водлугъ права и сего

статуту не учинили албо и учинивъшы справедливость, а отправы речи сужоное на

виноватомъ не въделали, тогды такового пана и слугъ врядъ нашъ, передъ который ся то

приточить, в томъ судити маеть. А онъ тому, кому обецавшы справедливость учинити на

року от него зложономъ, также и на року, в чотырохъ неделях по положенью позву

припалом, справедливости водле права не вделалъ або отправы суду своему не вчинилъ,

повиненъ будеть заразомъ у суду перъвей, ниж в право вступить, рубль грошей стороне

жалобной заплатити под таковою моцъю и повинностью, яко вышей о винахъ нестанъных

естъ описано.

А ведь же если бы се то показало на праве, ижъ тотъ панъ чинил оному справедливость

слушную, але онъ ее упоромъ своимъ нЪ принялъ и на ней не перЪставалъ и о то его ку

суду притягнулъ, тогды того рубля грошей платити не повиненъ будеть. Але еще тотъ

упорный самъ оному тотъ рубль тут же заразомъ у суду заплатити маеть. А доконченье

тое справы самое, о што межи ними идеть, там же заразом черезъ врядъ нашъ

розъсудкомъ правнымъ статися маеть. А где бы панъ того именья самъ або его врядникъ,

будь при прошенью права за таковыми позвы албо на томъ року, вышей менованом, праву

припаломъ, то естъ от положен[ь]я позву в чотырохъ неделяхъ, врядъника або слуги и

подданого своего вырекъся, тогды волно будеть стороне поводовой шкодника своего

увезде имати и, до вряду судового близшого притягнувшы, з нимъ, если бы неоселый под

нами, г[о]с[по]д[а]ремъ, былъ, правомъ ся обыходити, а панъ его боронити не маеть. А

если бы хто вырекшися врядника, слугъ, бояръ або подданыхъ своихъ, а предъся таковыхъ

обвиненыхъ в дворе або на именью своем переховывалъ, а то бы на него было слушне у

права перЪведЪно, таковый вси шкоды, в позве описаные, за доводом стороны жалобное

самъ платити виненъ будеть. А то се маеть розумети о речахъ меншихъ а не крвавыхъ, а в

речахъ крвавыхъ, если бы обвиненымъ шло о горъло, тогды врядъ маеть около того

заховатися водлугъ артыкуловъ, в семъ статуте о томъ постановеныхъ и нижей описаных.

Где бы ся теж то трафило, ижбы хто за обнесеньем позву з урадника, слугъ, бояръ або

подданыхъ своихъ справедливости учинити кому не хотел, а тотъ бы або тые обвиненые

въ якой кривде або шкоде по заложенью позву перъвей, нижли жалобникъ справедливости

собе у суду нашого с паном ихъ и з ними доведет, померъли, и то бы черезъ поводовую

сторону слушнымъ доводом было оказано и доведено, же перъвей за жывота тыхъ

Статут Великого княжества Литовского 1588 года [Электрон. ресурс]

Подг. О.Лицкевич. - Мн., 2002-2003.

http://starbel.narod.ru/statut1588.htm

винныхъ право прошоно, тогды тотъ панъ самъ за доводомъ жалобное стороны на речъ

самую, водле права учиненымъ, будеть ей виненъ о то, о што жалоба идеть, самъ у права

отказывати и с права што будеть сказано самъ заплатити и нагородити, а собе на

маетности оныхъ виноватыхъ того смотрети. А ведъ же въ инъшихъ речахъ, где не идеть о

кривду, от врядниковъ, слугъ, бояръ и подъданыхъ водле сего арътыкулу учиненую, о

большие важънейшые речы, о именья и о кгрунты мають быть листы упоминальные

даваны от суду земского подъ печатьми судей земскихъ.

Артыкулъ 49.

О томъ, если бы ся кому якая крывда стала от чые жоны албо сыновъ, также

дочокъ.

Уставуемъ: если бы ся кому стала якая кривъда в кгвалтехъ, наездехъ, боехъ, ранахъ,

забийстве, грабежохъ и въ иныхъ якихъ речахъ от жоны чией або тежъ от сына такъ того,

который бы уставичне дома пры отцы мешкалъ, яко и одъ того, который, хотя кому

служечы, а на часъ до дому отцовского прыехавшы, и под онымъ часомъ мешканья своего

на именью отцовъскомъ або пры матъце на ее именью властномъ або веновъномъ

мешкаючы, а кому будь в дому отцовъскомъ, матъчиномъ албо тежъ с того дому або

именья отцовского, матъчыного на домъ, на село, либо на кгрунтъ наехавши, албо теж на

дорозе крывду, шкоду якую учинилъ, тогды укривжоный маеть у того, в чиемъ або з

чыего именья то ся ему станеть, справедливости с того за листомъ упоминальнымъ

врядовымъ водлугъ артыкулу вышъшого сорокъ осмого просити. А хто бы

справедливости водлугъ права учинити не хотелъ, тотъ, будучи о то до суду належного,

яко и о слугахъ и людяхъ вышей описано, позванъ, виненъ будеть самъ стати. И доведет

ли жалобникъ того слушнымъ доводомъ або присягою, же ся то ему зъ его именья або в

дому его от жоны або сына его стало, а онъ жоны або сына за позвы ку розъсудъку

врядовому не поставить, то онъ самъ виненъ будет за жону и за сына такового кгвалътъ,

навезъки и шкоды вси стороне поводовой платити. Если ж бы мужъ оселости своей не

мелъ, а жона бы мела именье от него венованое або свое властное, тогды то, што за ее

вину с права будеть сказано, на ее жъ имен[ь]ю, будь венованомъ або властномъ,

отъправено быти маеть. А где бы шло о речъ крвавую, за што горломъ карають, а

позваный бы обвиненыхъ в томъ передъ врядомъ ку праву не ставилъ, менечи, яко бы не

мелъ ихъ у себе мети, тогды таковый маеть ся от того отпрысягнути, же то, што ся

жалобной сторонЪ кривды якое стало, тогды ся то стало безъ ведомости, рады и

позволенья его самого, также и на томъ, ижъ онъ тыхъ обвиненыхъ часу прошенья права о

то за листомъ упоминальнымъ у себе в дому не мелъ и не за ведомостью его о таком ихъ

учинку и безъ помочы а рады его з дому его зникнули, ани о нихъ ведаеть, а по такомъ

отпрысяженью самъ от горъла и всего, о што обжалованъ, воленъ будеть. А поводовой

стороне волно будеть тыхъ обвиненыхъ, где можеть бы в надолъжейшомъ часе, постигати

и правомъ их водлугъ ихъ учинку поконывати. Так же ся маеть розумети и о дочце,

паньне, и вдове, зятю и внуку, и каждом повиноватомъ неосе лом, которые бы, мешкаючы

пры родичохъ своихъ, кому в суседъстве кривду якую учинили, тогды такимъ же

обычаемъ з ними справедливости доводити. Пакли жъ бы позваный в такой речы без

прычынъ правъныхъ не сталъ, против таковому врядъ маеть сказанье чинити водлугъ сего

права посполитого и важности року.