Статут Великого Княжества Литовского 1588 года
Подождите немного. Документ загружается.
Статут Великого княжества Литовского 1588 года [Электрон. ресурс]
Подг. О.Лицкевич. - Мн., 2002-2003.
http://starbel.narod.ru/statut1588.htm
листе своемъ поменилъ, на которомъ где бы того хорого не зостано, иньде искати его не
повиненъ, и такъ то маеть быти розумено, яко бы не прысегнулъ. А стороне посланьца
своего, всхочет ли, при томъ вольно мети. Передъ которымъ вознымъ и стороною и его
посланьцомъ тотъ, што ся хоробою вымовляеть, маеть прысегнути, же правдиве
обложною хоробою на першых и на тыхъ другихъ рокохъ для хоробы стати не могъ. И
прысягнет ли, тогды от плаченья винъ воленъ будеть, а не всхочет ли прысегнути, тогды
таковый на третихъ рокохъ за тыми жъ позвы, яко на року завитомъ, або самъ або черезъ
умоцованого будеть винен стати и первей, нижли в право вступить, вины нестанъные за
обои прошлые роки заплатити, то естъ за перъшые роки стороне чотыры копы грошей, а
врядъ [так!] судьи с подъсудъкомъ копу грошей. А за другие роки совито, то естъ стороне
осмъ копъ грошей, а вряду две копе грошей. А заплатившы тые вины заразомъ стороне
жалобной усправедливитися. А хотя бы и прысягнулъ перед вознымъ на хоробе своей,
предъсе вжо на третихъ рокохъ повиненъ будеть становитисе и росправу наконецъ
прынять, хотя бы сам хоръ былъ, тогды черезъ умоцованого. Пакли ж бы на тыхъ третихъ
рокохъ ку праву самъ, ани черезъ умоцованого своего не сталъ або ставши винъ
нестанныхъ, перъвей нимъ в право вступить, заплатити не хотелъ, таковый речъ свою
тратить, а врядъ противъку него заховатисе далей маеть водлугъ арътыкулу вышнего
двадъцать второго в семъ же розделе. А естли бы хто, будь до суду земъского або
кгродского, на рокъ завитый будучи позванъ, за хоробою своею стати не могъ, тогды суду
и стороне, яко вышей в семъ арътыкуле описано, ознамити [так!] о собе мает, а тымъ речи
своее не тратить. Вед же естли бы на другий рокъ о тое жъ былъ позванъ, тогды перъвей
прысегнути на томъ, ижъ справедливе на перъшомъ року для хоробы своее стати не могъ,
а потомъ никоторыми прычинами и арътыкулами, в сем статуте описаными, не
вымовляючи, тамъ наконець усправедливитисе повинень будеть. А где бы такъ былъ хоръ,
же и на другий рокъ в той речи стати бы не могъ, тогды передъ тым другимъ рокомъ от
вряду и повету того, где на тотъ часъ тот хорий самъ будеть, маеть взят[ь] возного и
сторону двухъ шляхътичовъ, передъ которими тамъ, где на тотъ часъ будеть, присегу
учинити маеть на томъ, ижъ не ку зволоце стороне своей противъной, але правдиве за
хоробою своею на перъшомъ року стати не могъ. А тотъ возный и шляхъта, от вряду
взятые, естли тотъ хорый присягнеть, заразомъ передъ тымъ врядомъ, от которого
послани будуть, сознати мають, а потомъ, тое сознанье возъного и шляхъты выписомъ с
книгъ на другомъ року показавшы, предъсе черезь умоцованого усправедливитисе, яко
вышей описано, повиненъ будеть. А пакли бы, передъ врядомъ на другомъ року ставши,
не присегнулъ альбо передъ вознымъ, шляхътою присеги, учиненое врядовне, не
показалъ, тогды тым таковымъ самымъ поступкомъ тую речъ, о што позван, тратить. А
врядъ то на том другомъ року, не припускаючи стороны позваное ку отводу, за доводомъ
стороны поводовое на таковомъ вжо всказати маеть з винами за нестанье совитыми. А тое
ж се и о томъ розумети будеть, хто бы, позвавши на рокъ завитый, самъ за хоробою своею
на томъ року перъшомъ стати не могъ.
Артыкулъ 24.
Хто бы, кого позвавъши на роки судовые, самъ безъ слушное причины не сталъ або
бы кому на праве якого доводу або выводу не доставало.
Уставуемъ тежъ, хто бы, кого позвавши до земъства позвы перъшыми и на перъшые роки
судовые, еще на рокъ завитый, и будучы стороною поводовою, безъ слушныхъ прычинъ,
яко вышей о позваномъ написано, не даючи о собе прычины слушное суду и стороне
знати, самъ з доводомъ своимъ не сталъ, тогды, естли бы тотъ же и о то ж другий разъ
сторону свою противную позвалъ, маеть первей за нестанье свое позваному страву
заплатити, пану радЪ, естли бы самъ особою своею у суду на рокох былъ, десеть копъ
Статут Великого княжества Литовского 1588 года [Электрон. ресурс]
Подг. О.Лицкевич. - Мн., 2002-2003.
http://starbel.narod.ru/statut1588.htm
грошей, а инымъ всимъ урядникомъ и шляхте пять копъ грошей. А гдЪ бы панъ рада самъ
або врядникъ и шляхтичъ особою своею на рокохъ у суду не былъ, але умоцованого от
себе послалъ, тогды умоцованому его такъ, яко инъшому шляхтичу, пять копъ грошей. А
заплативши страву, тожъ потомъ о свое мовити можеть. А пакли ж бы, и другий раз
позвавъши того жъ и о тую жъ речъ, а самъ же и повторе такежъ без причинъ слушных, въ
статуте вышей описаныхъ, и не давши о них суду и стороне знати, не сталъ, тогды тую
речъ, о што позвалъ, тратить. А позваный тотъ, хто року и права за позвы пильнуеть, вжо
от того часу, о што позванъ, на вси пришлые часы будеть воленъ. Ведъ же и обмова тая
причинами статутовыми, хоробою або службою нашою, г[о]с[по]д[а]ръскою, и земъскою,
стороне поводовой не маеть болшъ ити и служити, только на двоих рокохъ. А естли бы
сторона поводовая, ставши, у право вступивши, маючи спор з стороною обжалованою на
праве, зъ яких припалыхъ причинъ, о которихъ передъ правом не ведала, а браласе еще на
який иный доводъ, которого на тотъ часъ ку праву на суде з собою мети не могла або о
немъ не ведала, а просила бы о отложенье на другие роки судовые, тогды судъ маеть ей
того допустити, а тымъ речи своее не тратить. А на других рокохъ судовыхъ, естли бы
самъ не сталъ або доводу не ставилъ, тогды речъ свою тратить. Такъ тежъ и сторона
позваная, естли бы на тых рокохъ и за такъ коротъкимъ часомъ, ему за позвы зложонымъ,
не могла правдиве за якою слушною а пристойною причиною листовъ або заводцы мети, а
брала бы собе в таковых речахъ и артыкулехъ на другие роки, тогды судъ маеть ей того
допустити. А ведъ же на тыхъ других рокохъ будеть повинъна вжо без позвовъ, только [в
оригинале "тольло"] за выписомъ врядовымъ того отложенья, со всимъ готова быти, яко
на завитомъ року, под стратою речы. И тотъ доводъ або выводъ, на которий ся отзывалъ,
показавши, маеть перъве [так!] на томъ присегнути, иж тотъ рокъ собе одеръжала и
упросила не на проволоку якую сторонЪ противной, але ижъ без того быти не могло. А
гдЪ бы на томъ присегнути не хотелъ, тогды таковый повиненъ будеть стороне своей
противной за шкоды, наклады его десеть копъ грошей, а на врядъ вины две копы грошей
заплатити.
Артыкулъ 25.
Хто бы кого черезъ судъ або черезъ еднанье ку праву позвалъ.
Уставуемъ тежъ: хто бы, с кимъ мевъши право и утративши которую речъ на праве або на
едънанью ее упустившы и заеднавши, а по суде або зъеднавъшися и тое еднанье, где о
кгрунътъ земленый або о горъло идеть, при листе своемъ еднальномъ на вряде сознавши,
а где о именье або о кгрунътъ земленый, або о горло не йдеть, такое еднанье листомъ
своимъ еднальнымъ, подъ печатью своею и с подъписью руки своее власное и тежъ под
двема печатьми людей сторонъныхъ, а хто писати не въмеет, тотъ при своей печати подъ
трема печатми людей сторонъных данымъ, упевнивши и утверъдивши, а о тое жъ засе его
до права позвалъ и на праве тое жъ речи знову искалъ и того доходилъ, таковый повиненъ
заплатити тамъ же заразомъ у суду стороне семъ копъ грошей, судьи две копе грошей,
подъсудъку копу грошей, а тотъ судъ або еднанье предъсе маеть при моцы зостати. А если
бы, позвавши о такую речъ, самъ не сталъ, тогды речъ свою тратить, а противной стороне
вольно будеть о то оного жалобника о свои п[е]н[е]зи и вину врядовую позвати.
Артыкулъ 26.
Ижъ в позвехъ нашихъ земъскихъ не маеть нихто ни на кого речей неучстивых и
образъливыхъ доброй славе писати.
Тежъ уставуемъ, ижъ в позвехъ нашихъ земъскихъ, которие ихъ беруть, не мають писати
речей дотъкливыхъ почъстивости, а где бы позвалъ такъ, тогды на тые позвы сторона
Статут Великого княжества Литовского 1588 года [Электрон. ресурс]
Подг. О.Лицкевич. - Мн., 2002-2003.
http://starbel.narod.ru/statut1588.htm
позваная, ставши, не повинъна отповедати, ажъ се онъ на другихъ рокохъ на позвехъ
своихъ поправить. Нижли што се дотычеть наезъдовъ домовъ шляхетъскихъ, кгвалътовъ
белымъ головам, пожогъ и розбоевъ и иного злочинъства, которие арътыкулы на судъ
нашъ, г[о]с[по]д[а]ръский, або на судъ головный, также и на вряд кгродский, а не
земъский належать, о то кождый подле учинъку такового можеть меновите в позвех
написати и то только реч учинъку выписати, не докладаючи в позвех ображенья
зверъхности нашое и ничого [в оригинале "ничоно"] иного дотъкливого.
Артыкулъ 27.
Хто именья свои в розных поветехъ маеть, а до колько судовъ розныхъ зъ именей
розныхъ на одны роки заразомъ будеть позванъ.
Уставуемъ, если бы хто с подъданых нашихъ, в розныхъ поветехъ именья свои маючи, до
розныхъ судовъ земъскихъ былъ позванъ первшими позвы и на перъвшие роки судовые, а
роки бы на одинъ часъ в тых поветехъ, до которыхъ естъ ку суду позванъ, притрафилисе,
тогды маеть в томъ повете стати, до которого ест о болшую речъ припозванъ. А ведъ же
сутяжымъ своимъ къ суду поветовому, у которого ся не становить, маеть через листы свои
отвороные и черезъ возного дати ведати стороне перед роками земъскими наближей за
тыдень, будь очевисте або на имен[ь]ю наблизшомъ, в томъ же повете лежачомъ, листъ
положивши, а вряду на рокохъ судовыхъ. А гдЪ бы и сторона в томъ повете оселости не
мела, тогды и стороне таковой на рокохъ же земъскихъ дати знати, ижъ для большое речы,
о которую естъ позванъ до инъшого повету, тамъ не становиться. А однако ж с тыхъ
книгъ, у которого ся суду становилъ, взявши выписъ, на другихъ рокохъ маеть показати
передъ судомъ, у которого ся не становилъ, ижъ ся правдиве большою справою
вымовлялъ, тогды нестанного не повиненъ будеть платити. По тому жъ, кгды бы хто кого
до одного повету в кривде своей позвалъ, а сам бы тежъ такий былъ от кого иншого до
другого повету на тые жъ одны роки позванъ, тогды таковый будеть мочи такежъ ув
одного суду большою справою, будь за своимъ позвомъ або за тымъ, што его позвано, на
перъшихъ рокохъ вымовитися и потомъ на другихъ рокохъ то водлугу [так!] науки, вышей
описаное, показати. А ведь же на другихъ рокохъ нихто не маеть болшою справою
вымовлятися, але се повиненъ становити и в отъказе быти, яко на завитомъ року, если не
самъ черезъ себе, тогды черезъ умоцованого своего подъ утратою тое речи, о которую
позванъ. А противъ роковъ завитыхъ такъ к[г]родъскому, яко и земъскому суду, в семъ
статуте вынятыхъ и назначоныхъ, большою потребою в ынъшомъ повете вымовлятися
нихто не можеть. Одно ж гдЪ бы ся то коли притрафило, ижбы одна особа была позвана
до двухъ судовъ кгродъских на одны рочки в таковыхъ речахъ, што бы о горло шло, тогды
таковый можеть ся ув одного суду такимъ запозваньемъ на первшыхъ рочкохъ вымовити
обычаемъ, вышей описанымъ. Ведъ же будучи о то повторе на другие рочки позванъ,
виненъ будеть выписомъ оного вряду, передъ которымъ ся становилъ, то показати, же ему
о такую речъ важную, о горъло, шло и надъ то еще присягнути, же тое позванье до
иншого вряду деялосе не жаднымъ форътелемъ, ани змовою якою хитрою ку зволоце
справедливости укривжоному [в оригинале "укривжоною"]. А пакли бы того выписомъ не
показалъ, або и показавши выписомъ, а присягнути на томъ не хотелъ, тогды для оного
нестанья своего на рочкох перъвшых маеть на другихъ рочкох згола без жадныхъ
доводовъ речъ тратити, и врядъ то на немъ стороне водлугъ жалобы, в позве описаное, и
водлугъ права сказати маеть такъ за станьемъ, яко и за нестаньемъ его.
Статут Великого княжества Литовского 1588 года [Электрон. ресурс]
Подг. О.Лицкевич. - Мн., 2002-2003.
http://starbel.narod.ru/statut1588.htm
Артыкулъ 28.
О кривдахъ гостей приежъдчих чужоземъских.
Уставуемъ, естли бы ся которому чужоземъцу при насъ, г[о]с[по]д[а]ри, або хотя и в
небытности нашой в которомъ месте або подъ которимъ врядомъ сталъ от которого
тубильца а який кгвалтъ, бой, розбой, зраненье и отнятье кгвалътовное маетности его и
што колвекъ с тых вышей помененыхъ речей, тогды обвиненый в тыхъ речахъ без позву, а
мещанин простый ч[е]л[о]в[е]къ без роковъ, не проволокаючи ничимъ, повиненъ ся
усправедливити за заказомъ передъ нами, передъ воеводами и врядниками нашими
замъковыми дворъными, а мещане, мешкаючие подъ майдебуръскимъ правомъ, передъ
местъским урядомъ. А естли бы хто с подъданыхъ нашихъ, на жалобу гостиную будучи
заповеданъ, прочъ зъехалъ, тогды на именью его с позвомъ нашим возный маеть быти
посланъ, або врядъ замъковый маеть послати с позвомъ своимъ возного. А хотя бы его на
именью не было, предъся тотъ позовъ на именьи его маеть быти положонъ и рокъ завитый
зложонъ ку праву стати за чотыри недели, а он наконецъ, ничимъ не вымовляючисе и
позву никоторими причинами не збиваючи, виненъ будеть на тотъ часъ стати и
усправедливитисе. А гдЪ предъсе на тотъ день, ему зложоный, не сталъ, тогды маеть быти
то на немъ, о што жалоба естъ, подле доводу сказано и отправа дана на именью его
заразомъ, роковъ статутовыхъ не складаючи.
Артыкулъ 29.
О тыхъ, которые бы, не маючи оселости в томъ паньстве або повете которомъ, а
тамъ, приехавши з стороны або з ыного повету, збытокъ або якую шкоду кому
учинили.
Тежъ уставуемъ, ижъ хто бы кому кольвекъ з ыное земъли чужоземець албо хто жъ
колвекъ неоселый в томъ паньстве нашомъ, великомъ князстве литовъскомъ, приехавши в
которий кольвекъ поветъ, где оселости не маеть, або подъ уряд и до места нашого,
учинилъ тамъ кому кгвалтъ, бой, раны, шкоду и який же кольвекъ збытокъ, тогды тамъ
же, а не где инъдей, на вряде нашомъ замковомъ або, где бы замъку не было, в дворе
нашомъ староства судового водле права сужонъ и за доводомъ слушнымъ сказыванъ быти
маеть и отправа на немъ чинена. А где бы хто за заказомъ до вряду ити и
усправедливитисе не хотелъ, тогды таковый маеть моцно черезъ врядъ заразомъ ку праву
постановенъ быти. А кгды с права в чомъ виненъ зостанеть, а не всхочеть того заразомъ
платити албо слушного в томъ же повете оселого рукоемства по собе дати, тогды врядъ
маеть его до везенья осадити и деръжати в немъ дотыхъместъ, поки стороне жалобной
досыть учинить. Пакли ж бы не могъ быти от вряду пойманъ и прочъ уехалъ, тогды врядъ
маеть водлугъ учинку его и водлугъ статуту сказнь против него за доводомъ вделати и
стороне жалобной выписъ сказанья своего дати, а жалобникъ с тымъ судовымъ листомъ
маеть его везде, где можеть, постигати. А где подъ которымъ врядомъ постигнеть, оный
врядъ будеть повиненъ тотъ суд другого вряду ку выполненью приводити. А где бы хто,
хотя оселый в ыншомъ повете, а приехавши в который оный поветъ, где оселости не
маеть, або подъ врядъ и до местъ нашихъ, учинилъ тамъ кому кгвалътъ, бой, раны, шкоду,
розбой, забийство [так!] и який же кольвекъ збытокъ такъ шляхътичу и его подъданому,
яко и местъскому ч[е]л[о]в[е]ку, тогды в таковыхъ припалыхъ речахъ, не отзываючисе до
своего повету, повиненъ будеть за заказомъ передъ врядомъ замковымъ судовымъ тамъ,
где што будеть смелъ учинити, стати и усправедливитисе. А естли бы черезь заказъ не
усправедливившисе або заразомъ по учинъку первей заповеди уехалъ, ино врядъ
замъковый того повету, в котором се то станеть, маеть с позвы своими на именью его, в
котором бы кольвекъ повете было, послати, а жалобникъ, таковые позвы от вряду взявши,
Статут Великого княжества Литовского 1588 года [Электрон. ресурс]
Подг. О.Лицкевич. - Мн., 2002-2003.
http://starbel.narod.ru/statut1588.htm
маеть тые позвы з вознымъ оного повету, в которомъ тотъ виновайца оселость будеть
мети, на именью его положити, рокъ ознаймити чотыри недели, на который рокъ за оными
позвы будеть обжалованый повиненъ перед тымъ врядомъ, подъ которимъ што будеть
учинилъ, стати и усправедливитисе, яко на року завитомъ. А пакли бы на томъ року
обжалованый не сталъ, тогды врядъ маеть противъ него сказнь для непослушеньства его
безъ доводу на упадъ учинити и того сказанья своего стороне жалобной листъ судовый
дати. А потомъ жалобникъ маеть с тымъ листомъ судовым до вряду замкового судового
оного повету, где тот виноватый оселост[ь] мети будет, ехати, а оный врядъ, вгленувши в
судъ або сказнь тую, маеть и повиненъ будеть заразомъ жалобнику на немъ самомъ
водлугъ учинъку, а шкоду на именью и на маетности его отправити водлугъ оного суду и
статуту. А слуги паньские неоселые, естли бы хто з нихъ таковый кгвалтъ и зраненье або
шкоду якую кому учинилъ, маеть задеръжанъ быти у везен[ь]ю на замъку и на вряде
двору нашого, подъ которимъ се то станет, а оный слуга о собе маеть дати знати пану
своему. А если бы не мелъ черезъ кого знати дати, тогды врядъ, зъ его жъ статку
нанявъши, повиненъ будеть пану его ведомость дати; естли бы тотъ панъ у великомъ
князстве литовъскомъ оселость мелъ, тогды на близшое именье его з листомъ своимъ
послати маеть; а неоселому у великомъ князстве литовъскомъ врядъ не будеть повиненъ
ведати давати, одно оный слуга сам маеть се о томъ старати, ижъбы пану его ведомость о
нем дошла. А врядъ толко до четырохъ недель маеть пана его, кимъ се озоветь, ку праву
ждати, а панъ его повинень будеть тамъ до того вряду самъ приехати або кого прислати и
чинен[ь]я справедливости прислухивати. Пакли ж бы панъ его самъ не приехалъ або и
прислати не хотелъ ку прислуханью справедливости надалей до чотырохъ недель, а то,
естли бы где далеко оный панъ былъ, тогды вжо врядъ самъ кгродский, осадивши при
собе людей добрихъ, шляхъту, справедливость з нимъ жалобному чинити маеть подле
сего статуту, а в речахъ такихъ, гдЪ о горъло не йдеть, можеть врядъ обвиненого на
рукоемство слушное до права дати. А гдЪ тежъ хто кого невинъне объжаловалъ и за его
обжалованьемъ на вряде задеръжанъ былъ, а тымъ задеръжаньемъ его обелжилъ, ку
шкодамъ и накладом привелъ або о везенье приправилъ, тогды оный врядъ тамъ же
заразомъ маеть того пилне дойзрети, гдЪ бы се то показало, ижъбы от того, хто невинъне
его обжаловалъ, яко за обельжен[ь]е его водлугъ стану его навезку, такъ тежъ и за вси
шкоды, которые бы се ему при бранью до везенья в маетности его стали, за доводомъ
слушнымъ заплачоно и нагорожоно ему было кромъ жадныхъ позвовъ. А для того и оный,
хто кого, в чомъ обвинивъши, на вряде задеръжить и оскаръжить, маеть быти до учиненья
справедливости от вряду парукою уищонъ. Естли жъ бы врядъ в томъ которой кольвекъ
стороне фолькговалъ, а скуточное справедливости и отправы укривъжоному тамъ же
заразом не вчинилъ, тогды вжо не сторона, але врядъ самъ повиненъ будет яко навезку
водлугъ стану его, такъ тежъ и шкоды вси за слушнымъ доводомъ оному, на вряде
невинне обвиненому або укривжоному, платити.
Артыкулъ 30.
Што мають судити воеводове, старостове и деръжавцы и о ихъ позвехъ, о што мають
даваны быти, и о сказанью за нестаньемъ сторонъ и о горачомъ учинъку.
Уставуемъ тежъ, хотечи мети, и даемъ моцъ, абы воеводове и старостове наши судовые,
кождый в повете и вряде своемъ судовомъ, судили и справовали и позвы свои давали о
тые арътыкулы, меновите тутъ описаные, то естъ о наездъ кгвалътовный на домъ
шляхетъский, не толко на самый дворъ, але и на гумно або на дворецъ, гдЪ быдло и
инъшое г[о]с[по]д[а]ръство домовое бываеть ховано, к тому о кгвалтъ костела
хрестияньского водълугъ арътыкулу третего в розъделе одинадъцатомъ, о кгвалътоване
паненъ и невестъ, о кгвалтъ в местех нашихъ, о розбой по дорогахъ, о злодейство, о
Статут Великого княжества Литовского 1588 года [Электрон. ресурс]
Подг. О.Лицкевич. - Мн., 2002-2003.
http://starbel.narod.ru/statut1588.htm
фалшъ, о пожогу дому або гумна, о чародейство, о трутизну и отповедь от шляхътича
шляхътичу на здоровъе або огнемъ, и о голову шляхетъскую, такъже и поручниковъ
такихъ, которые бы о похвалъку на горъло або огнемъ кого ручили. Але о збеги слуги и
подданыхъ вшелякихъ и челеди невольное, о то, похочеть ли, до кгроду або до земъства
волно будеть позвать. А врядъ, а в небытности ихъ наместъники ихъ оселые з судьею и
писаромъ замковыми, присяглыми и в том воеводъстве або повете тежъ оселыми, мають и
моцъ мети будуть судити, отправовати и кончити подле сего статуту. А гдЪ бы хто на
горачомъ учинку тыхъ вышей помененыхъ арътыкуловъ которого жъ кольвекъ стану былъ
пойманъ, тогды тотъ маеть быти сужонъ без позвовъ. А тое иманье оселого на горачомъ
учинку маеть се розумети, коли бы хто могъ быти пойманъ заразомъ того жъ часу на
самомъ такомъ учинку, о што горъломъ карають. А естли бы, таковый збытокъ учинивши,
заразомъ пойматисе не далъ, але бы зникалъ або се скрил, такового вольно искати з
урядомъ, ведъ же не далей, одно от пополъненья того учинку через двадъцать чотыри
годины зекгаровые. А то се маеть розумети о томъ, гдЪ бы се што такового збытку стало в
месте альбо в селе, але хто бы и в томъ часе з места або з села, гдЪ ся учинокъ станеть до
именья и до дому своего шляхетъского уехалъ альбо вшолъ, тотъ иманъ вжо быти не
маеть, одно позыванъ, а неоселого завжды, коли и гдЪ может потрафити, волно имати. А
пакли бы заразомъ на горачомъ таковомъ учинку оселый не былъ пойманъ, тогды вжо
позвы от вряду замкового ку праву маеть быти припозванъ, за которыми позвы, звлаща в
речахъ таких крвавыхъ, гдЪ о горъло идеть, сторона позваная не черезъ умоцованого, але
сама очевисте повинна у суду становитися, а позву таковому кгродъскому рокъ не маеть
быти долъжейший такъ за очевистымъ, яко и зао[ч]ным поданьемъ позву толко за чотыри
недели. А естли бы хто якого кольвекъ стану, также и рожаю, будь мужского або и
женьского, будучи до суду кгродъского позванъ, а за тыми позвы и на тотъ рокъ стати або,
ставшы, а росправитьсе не хотелъ, а шло бы о такую речъ крвавую, за што горъломъ
карають, тогъды тотъ врядъ маеть его за нестанъного на выволанье здати и о томъ намъ,
господару, черезъ листъ свой отвороный ознаймити, а мы, тому не фолькгуючы, без
всякое проволоки и откладанья на инъшый часъ, але заразомъ взявшы о томъ от того
вряду на того ведомость такового обвиненого и вряду нашого непослушного, маемъ зъ
земли паньствъ нашых казати выволати. А гдЪ бы выволаный, в таковомъ учинку хотечи
се того справити, насъ, г[о]с[по]д[а]ра, о кглейтъ просилъ, тогды мы, г[о]с[по]д[а]ръ,
таковымъ выволаньцомъ маемъ подънесенье на выволанье и листы наши кглейтовые ку
справе зъ замереньемъ на то певного часу, и то неболшъ толко до трехъ разовъ, давати
водлугъ арътыкулу в розделе перъвшомъ дванадъцатого, абы се за кглейтомъ нашимъ
того, хто в чомъ будеть обвиненъ, справовалъ передъ урядомъ нашимъ оного жъ
воеводъства або повету, гдЪ се початокъ тое справы станеть.
А што бы власному суду нашому, г[о]с[по]д[а]ръскому, належало, то мы сами с паны
радами нашими без жадное проволоки и откладовъ судити и росправовати маемъ. Вед же
тое подънесенье выволан[ь]я и кглейтъ нашъ предъсе горачому учинку и праву а каранью,
о немъ в статуте описаному, ничого уближати и уймовати не маеть, але мужобойца,
правомъ переконаный, горъломъ каранъ будеть, а головщина, навезка и шкоды, о што
буде [так!] позвано заразомъ безъ складанья роковъ статутовыхъ, яко сторона
объжалованая на року позваномъ не станеть, маеть от насъ, г[о]с[по]д[а]ра, если се то в
суду нашого точити будеть, а если на вряде, тогъды такежъ и от вряду нашого судового
увязанье въ именье объвиненого, до сконъченья права дано быти, а о самого особу, яко
вышей поменено, маеть врядъ на выволанье до насъ, г[о]с[по]д[а]ра, отослати. Ведь же в
речахъ меньшихъ, не кривавыхъ, где о горъло не идеть, врядъ не маеть на выволанье
нестаного отсылати, только для непослушенъства речъ, на позве описаную, без доводу
сказати виненъ будеть, вынявши то, хто бы былъ позван о неучиненье досыть запису або
Статут Великого княжества Литовского 1588 года [Электрон. ресурс]
Подг. О.Лицкевич. - Мн., 2002-2003.
http://starbel.narod.ru/statut1588.htm
суду и сказанью врядовому. Противъ таковому сказанье за узнаньемъ запису або водлугъ
суду перъшого чинено быти маеть. Можеть тежъ врядъ кгродский судити о кгвалтовное
выбитье з дому, з упокойного мешкан[ь]я и отнятья именья, людей и всяких кгрунътовъ,
звлаща естли бы сторона укривжоная мимо судъ земъский для прудъшое справедливости
хотела о то до кгроду [в оригинале "кргоду"] позвати обычаемъ и способомъ, нижей
описанымъ. Еще тежъ позывано быти может до кгроду о збитье возного и неучъщенье
листовъ, от него посланыхъ, и о мери на зъбожъе и на инъшие речи, неслушне надъ уставу
сего статуту бранье, о безъправное везенье шляхтича, яко о томъ всемъ ширей на своихъ
местъцахъ в томъ же статуте ест описано. А болшъ того надъ тые арътыкулы, вышей
помененые и на судъ кгродъский в семъ статуте вынятые, не маеть суд кгродский позвовъ
своихъ давати и судити. А естли бы надъ сее замеренье важилъсе врядъ кого упоръне
судити, тогды судъ его не маеть быти деръжанъ.
Артыкулъ 31.
О опатръности везенья на врядехъ нашихъ и о бранью потуремного отъ вязней.
Уставуемъ, ижъ от вязневъ потуремного, поланцужного и от иного всякого везенья вряды
наши, почавши от места нашого столечного Виленьского ажъ по всимъ инымъ замкомъ и
двором нашимъ, не мають болшей брати, толко от шляхтича сорокъ осмъ грошей
литовскихъ, а от боярина путного и чоловека простого двадъцетъ чотыри гроши
литовъскихъ. А то врядъ маеть брати одинъ разъ, кгды остатнимъ разомъ вязенъ або на
смерт[ь] або на вольность з везенья выходить. И естли вязень на волност[ь] выйдеть, то
онъ самъ выкупитися тымъ з везенья маеть або тотъ, хто его невиньне осадити далъ. А где
бы на смерт[ь] былъ выданъ, тогды сторона жалобная маеть то вряду заплатити. Ведъ же
кождый врядъ нашъ, приймуючи вязня до везенья, вжо отсихъместъ в строжи от стороны
тое, хто вязня подасть, потребовати не маеть, але принявши вязня за своею сторожо[ю] и
[в оригинале: «о»] опатрностыо доброю такъ, яко бы до справы не утекъ, повиненъ будеть
ховати, а сторона вязню своему, естли будеть неоселый, толко на страву на день по
чотыри пенези винъна будеть давати. Прото для лепшое опатръности мають воеводове,
старостове везде в замкохъ и дворехъ нашихъ судовыхъ казати побудовати вежы моцные
и глубокие по шести сажонъ в земли, и при томъ инъшие, не в земли, лжейшое везенье,
але предъсе за замъкненьемъ и добримъ моцнымъ обварованьемъ мети. А где бы вязень
таковый, на которомъ вряде осажоный, утекъ, тогды тотъ, хто такового вязня в заведанью
своемъ за порученьемъ воеводъ, старостъ судовыхъ мел, если вышогородъский або
городничий, где такие вряды суть и будут ли мети собе вязни поручоные. А где
вышогородъских або городничихъ нетъ, тамъ наместъникъ або подъстаростий, кому
которий вязень от стороны жалобливое до везенья подан будеть, маеть того вязня надалей
за дванадъцать недель отыскати и до права стороне ставити. А не отыщет ли за дванадцать
недель, тогды шкоду, на чомъ сторона жалобная поприсягнеть або якимъ иншимъ
слушным доводомъ доведет, виненъ будеть платити. И для того панове воеводове и
старостове судовые тотъ врядъ догледанье вязневъ мають злецати и звератисе того
людямъ добримъ, вери годнымъ народу шляхетского. А естли тотъ вязень будеть на
горъло седелъ, а не могъ бы быть надалей до полугодья отысканъ, ино тот же врядъ, яко
верху описано, которому бы от стороны тотъ вязень былъ поданъ або от воеводъ, старостъ
ку осаженью и догледанью везенья злецонъ, з розсудку воеводъ, старостъ маеть
отприсегнутисе, же тое утеченье сталосе без рады, ведомости и фолькги его и не за
неопатръностью або недъбалостью его. А за голову або за раны, шкоды стороне за
доводомъ слушнымъ нагороду и заплату учинити. А воеводове и старостове мають в
такихъ речах безотволочную справедливость чинити такъ, ижбы в тыхъ часехъ, вышей
замероныхъ, за дванадъцать недель або за полъгода сторона жалобная конечную
Статут Великого княжества Литовского 1588 года [Электрон. ресурс]
Подг. О.Лицкевич. - Мн., 2002-2003.
http://starbel.narod.ru/statut1588.htm
справедливость и зъ отправою речы присужоное одеръжати могла, а оного вязня, гдЪ бы
се потрафило, предъсе будеть волно такъ тому вряду, зъ чиего везенья утечеть, яко и
стороне жалобной имати и правомъ передъ тымъ врядомъ, гдЪ его постигнеть,
поконывати. А если врядъ того вязня постигнеть, тогды маеть на немъ собе шкодъ своихъ
позыскивати або вязня стороне жалобной вернути. А коли ему подасть, тогды сторона тую
нагороду, што от вряду возметь, верънути маеть. А гдЪ сторона жалобная сама оного
вязня пристигнеть, тогды тые шкоды врадови тому верънути будеть повинъна, а того
вязня водлугъ права наконецъ поконывать во всемъ томъ, о што ему идеть. А естли бы хто
якого ж кольвекъ стану такъ своволный былъ, а вязня зъ замъку або двора нашого з
везенья або тежъ вжо выданого на смеръть гдЪ на улицы або на дорозе кгвалтовне отнял
або ката при таковомъ вязню забилъ, а не былъ бы заразомъ на таковомъ учинку пойманъ,
тогды таковый, будучи о то до нас, г[о]с[по]д[а]ра, на рокъ завитый позванъ, самъ и с
помочниками своими, яко бунтовники и взрушители права посполитого, горъломъ и
отсуженьемъ почстивости карани быти мають, а шкоды и наклады стороны жалобное за
доводомъ совито нагородити и заплатити таковые винъни будуть.
Артыкулъ 32.
О нечиненю фолькги у везенью.
Опатруючи то, абы владза врядовъ нашихъ и моцъ права посполитого ку завъстегненью
своволенъства людъского до выконанья своего завжды приходила, уставуемъ и хочемъ то
мети, ижъ кгды врядъ судовый земъский в которой земли або повете албо тежъ судъ
головный за який выступъ кого водлугъ арътыкуловъ сего статуту до везенья скажеть и
отошлет на везенье до замку або двору нашого судового, тогды врядъ нашъ кгродъский
маеть и повиненъ будеть не только безъ жадныхъ вымовъ и фолькги таковыхъ людей до
везенья приймовати, але гдЪ бы от суду земъского, головного и кгродъского которая
особа на горъло была сказана, а змоцнивъшисе не далъ бы се осадити, тогды не толко
врядъ врядови ку пойманью такового сказаного помочъ давати повиненъ, але врядъ
местъский и место, в которомъ се то деяти будеть, противъ таковому непослушному або
противному взрушитисе мають, яко бы таковый свовольникъ пойманъ и до везенья данъ и
водлугъ сказни врядовое каранъ былъ.
А помочники таковые, которые бы поймати его боронили, таковой же вине и каранью
подълегають, яко тотъ самъ злочинца, правомъ переконаный. К тому тежъ такий вязень,
на горъло сказаный, по сказанью врядовомъ, кгды апеляцыя дойдеть до нас,
г[о]с[по]д[а]ра, або до суду головного, тогды што намоцней везеньем осмотренъ быти
маеть в той вежи, которая естъ на головники описана, до учиненья противъ нему декретъ
от нас, г[о]с[по]д[а]ра, або от суду головного, до которого права апеляцыя належная
допустить. Ведь же тыхъ, которые рукоемъство слушное по собе дадуть, тыхъ водле
трыбуналу заховать. А такового вязня, который бы на горачомъ учинъку, за што горломъ
карають, былъ пойманъ, и до замъку данъ, маеть моцъ врядъ оковами и ланцухами у
везенью другомъ, где головниковъ не сажають, его опатрити, яко бы с того везенья не
утекъ ажъ до росправы. А хто бы зъ едънанья за який выступъ свой везеньемъ теръпети
самъ доброволне черезъ який часъ поднялъсе, тогды передъ часомъ, замероным седенью,
врядъ кгродский не маеть вызволяти, ани фолькги у везенью чинити безъ позволенья
самое стороны. А тымъ, которихъ право на седенье до вежи на дно скажеть, хотя бы и
сторона противная волнымъ везенья чинила, вряд никоторое фолкги чинити не маеть, а
тому всему мають досыть чинити подъ виною, в семъ арътыкуле нижей описаною. А хто
бы з воеводъ, старостъ судовыхъ або ихъ врядниковъ того се важилъ, а тому вязню до
вежи на дно, будь от насъ, г[о]с[по]д[а]ра, або от вряду кгродского, або тежъ от которого
Статут Великого княжества Литовского 1588 года [Электрон. ресурс]
Подг. О.Лицкевич. - Мн., 2002-2003.
http://starbel.narod.ru/statut1588.htm
иного вряду нашого сказаному, якую фолькгу у везенью чинилъ и допущалъ ему собе
седенье вышъшого, нижли на дне, чинити або комины у вежи будовати, або бы кому и в
ынъшомъ лжейшомъ везенью фолкгу якую надъ сказанье судовое чинилъ, таковый
воевода, староста або врядъ его и хто кольвекъ везенье в моцы своей мети будеть, будучи
о то от стороны болячое до суду земъского позванъ на рокъ завитый, за доводомъ
слушнымъ правнымъ повиненъ будеть той стороне болячой сорокъ копъ грошей
заплатити, иле кроть о то позвано и переведено то на него будеть, а стороне болячой
вольно будеть завжды того догледати, якъ и где вязень, будь за голову або за який иный
выступъ, седеть. А врядъ кгродъский не маеть ему того боронити подъ таковою жъ виною,
вышей описаною, колько бы раз о то его позвано и доведено. Ведъ же однакъ врядъ
кгродъский маеть, хотя передъ нимъ самымъ правомъ переконаного албо от вряду
земъского, або суду головного, до везенья по сказанью отосланого, не кождого до вежы в
землю сажати, але водлугъ учинку и выступку, яко около того в семъ статуте описано.
Прото в которомъ арътыкуле сего статуту вежа которому вязню поменена, тотъ в таковую
сажонъ, которому тежъ другая, лжейшая, тотъ такъже в той сажонъ быти маеть водле
выступу своего. А гдЪ бы хто оселый за який же кольвекъ выступъ свой поточный,
окромъ кривавого выступъку, противъ которой особе народу шляхетъского албо противко
врядови якому учиненый, на везенье которое водлугъ сего статуту сказанъ и до вряду
отосланъ былъ, а досыть бы тому везенью на часъ назначоный не вчинилъ, тогды за
выступокъ стороне своей противной сорокъ копъ грошей, а врядови другую сорокъ копъ
грошей упадаеть и тыми винами до седенья маеть быти примушонъ водлугъ сего статуту
розделу третего арътыкулу двадъцать семого. А естли бы неоселый тымъ же способомъ до
такового везенья данъ былъ, а з него бы утекъ, которого тыми винами не было бы щого
[так!] примусити, а не былъ бы пристигненъ и повторе пойманъ, тогды тотъ врядъ маеть
нам, г[о]с[по]д[а]ру, листомъ своимъ о томъ ознаймити, а мы того жъ часу без кождое
проволоки маемъ такового неоселого зо всих паньствъ нашихъ выволати, яко о томъ в
семъ же статуте естъ описано.
Артыкулъ 33.
О рочкох, кгродскому суду постановеныхъ, и о давности позванья до кгроду, о
выбитье с покойного деръжанья.
Уставуемъ, ижъ рочки ку отправованью судомъ кгродъскимъ мають быти кождого месеца
и починатися мають первшого дня личбы месечное. А гдЪ бы первшого дня свято
трафилося, тогды назавтрее по святе рочки починатисе будуть, а трвати судовне мають
через две недели, на которие рочки кождый, кому бы потреба указывала, маеть сторону
свою порадъкомъ статутовымъ такъ от заочного, яко очевистого поданья позву за чотыри
недели позывати. А хто бы за недоспехомъ своим не могъ бы за чотыри недели передъ
початьемъ рочковъ позвати, тогды и тыдень в рочки рокъ приймованъ быти маеть, толко
бъ от позванья чотыри недели сполнилися. А гдЪ бы за припадкомъ выбитья с покойного
деръжанья в часе такъ короткомъ, жебы укривжоному ку позванью на рочки перъвшие
чотырох недель недоставало, тогды таковому и на другие рочки волно будеть позвати,
только бъ от выбитья до позванью десети недель не омешкалъ. Ведъ же если бы хто о
выбитье з спокойного деръжанья до десети недель позвати не могъ с тых причинъ, то естъ
за служъбою нашою, г[о]с[по]д[а]ръскою, земъскою або для поветрея морового, тогды.
доведъшы того слушне водле права, ижъ за которою с тыхъ причинъ в десети неделяхъ не
могъ позвати, предъсе и по выстью тыхъ десети недель позвы кгродские таковому ити и
даваны быти мають, только бы зась по утишенью поветрея, або приехавши с послуги
нашое до именья своего, зася десети недель не омешкалъ. А естли тыхъ причинъ
Статут Великого княжества Литовского 1588 года [Электрон. ресурс]
Подг. О.Лицкевич. - Мн., 2002-2003.
http://starbel.narod.ru/statut1588.htm
предъречоныхъ не доведеть и не покажеть, тогды вжо о то до суду земъского позывати
маеть на рокъ завитый, такежъ о выбитье або отнятье спокойного деръжанья.
Артыкулъ 34.
О позвехъ кгродскихъ и о року за ними завитомъ.
Уставуемъ, ижъ во всихъ таковыхъ речахъ, на судъ кгродский [в оригинале: «кгродским»]
вынятыхъ, мамърамы на позвы мають быти даваны подъ печатми п[а]новъ воеводъ, а в
поветЪх, где воеводъ нетъ, ино старостъ судовыхъ, а не ихъ намесниковъ. А рокъ за
кождыми позвы кгродскими маеть быти завитый подъ страченьемъ права. А ведь же
писаръ на томъ мамраме мает рукою своею написат[ь] дату, которого дня выдаеть тотъ
позовъ, справуючисе далей водле арътыкулу осмънадцатого в том же розделЪ.
Артыкулъ 35.
О промешканью часу позванью до кгроду о голову шляхетскую и о наездъ домовый
и иные учинъки крвавые.
Теж хто бы о голову шляхетскую и о наездъ кгвалтовный и крвавый на домъ шляхетский,
где бы се стало забитье або зраненье, такъже о кгвалтъ костелный, о кгвалътъ паненъ и
невестъ, о розбой, пожогу и инъшие речи крвавые, то естъ за што горломъ карают, на судъ
кгродский вынятые, оселого в томъ паньстве не позвал ку праву черезъ тры годы, таковый
вжо вечнЪ о то молчати маеть. Одно жъ где бы по забитой голове шляхетъской дЪти або
близъские такие, кому бы о то правомъ чинити належало, еще летъ недорослыхъ были,
або бы и дорослыми будучи, а въ томъ паньстве нашомъ не были, але бы мешкали где в
ынших панъствахъ чужихъ, тогды таковые дети або близъские, дошедъши летъ
зуполъныхъ або с чужихъ земль приехавъши, могут о то правомъ чинитн, толко бы по
дошъстью летъ або по приеханью своемъ зъ земль чужихъ трехъ годовъ с позваньемъ не
омешкали.
Артыкулъ 36.
О присязе старостъ замковъ и дворовъ нашихъ, г[о]с[по]д[а]ръскихъ, судовыхъ.
Постерегаючи мы, г[о]с[по]д[а]ръ, с повинности нашое справедливости светое, жебы на
вшелякомъ местъцу в боязни божой отправована была, такъ уставуемъ, ижъ кождый
староста замъковъ и дворовъ нашихъ судовыхъ, которие не суть в лавицы рады нашое и
до рады на чиненье, захованье и помноженье справедливости и покою посполитого не
присегали, такъ тые вжо, што тепЪръ староства такие судовые мають, яко и которие
потомъ з ласки нашое, г[о]с[по]д[а]ръское, мети будуть, мають тепЪръ держачие такие
староства скоро по выданью ку вживанью сего поправеного статуту на перъшихъ рочкохъ
кгродских, а тые особы, которимъ по выданью сего теперЪшнего статуту поправеного на
перъшихъ по томъ ихъ вступенью на тые староства рочкохъ кгродскихъ, тежъ при
собранью шляхты, которие в тотъ часъ прибудуть, присегу на суды вделати ротою судьи
земъского, а поколь того не учинить, потуль врядомъ своимъ шафовати не можеть. Ведь
же тые воеводове и старостове теперЪшние украинъные, которие передъ нами,
г[о]с[по]д[а]ремъ, присягу на вряды свои учинили, вжо не будуть повинъни повторЪ
присягати.