Статут Великого Княжества Литовского 1588 года
Подождите немного. Документ загружается.
Статут Великого княжества Литовского 1588 года [Электрон. ресурс]
Подг. О.Лицкевич. - Мн., 2002-2003.
http://starbel.narod.ru/statut1588.htm
Артыкулъ 50.
Хто бы, маючи именье заставное або с права в презыску поданое, в суседъстве кому
кгвалътъ албо шкоду вчинилъ.
Уставуемъ: где бы хто, маючи от кого имен[ь]е, собе в суме п[е]н[е]зей заставленое албо с
права от вряду в презыску поданое, кому иному в суседъстве з особы его самого або слугъ
его такъ в кгвалътехъ, боехъ, грабежохъ, яко тежъ отнятьемъ и привлащеньемъ собЪ до
такового именья якихъ кгрунътовъ або пожитковъ и в ынъшихъ якихъ речахъ шкоду с
того именья учинилъ, тогды укривъжоный, таковые шкоды осветчившы и оповедавши
урядовне, мает з вечности самого дедича того имен[ь]я а заставника з сумы его обудвух
однымъ позвомъ позвати, выписавшы в позве крывду свою, в чом се ему от того
заставника албо в презыску держачого с того имен[ь]я деети будеть, жебы самъ с тымъ
заставникомъ або в презысъку держачымъ сталъ, ему се усправедливилъ, а тые позвы на
том же именью покладаны быти мають, который позовъ держачий такового именья
виненъ будеть дедичу оного именья ознаймити, з нимъ сполне до права становитисе и в
отказЪ быти. А вряд будеть моцонъ за перевЪденьемъ правнымъ отправу на том же
именью, с которого ся кривда деяла, учинити. Ведь же за кривды и шкоды, от самое особы
держачого або слугъ его починеные и с права сказаные, дедичъ оного именья платити не
будеть повиненъ, лечъ тот же держачый платити маеть. А хотя бы укривжоному отправа
на томъ именью была з уряду дана, тогды пры выкупенью [в оригинале: «выкупепью»]
оного именья дедичъ держачому, откладаючи его суму п[е]н[е]зей, таковую суму, за
выступокъ его албо слугъ его присужоную, з сумы его вытрутити воленъ будеть. А где бы
з ураду большая сума над суму того заставника сказана была, тогды то не на томъ именьи
оного дедича, але на особе заставника отправлено быти маеть. По тому жъ где бы ся отъ
бояръ и подданыхъ такового жъ именья, яко се вышей поменило, кому в суседъствЪ в
чомъ колвекъ якие кривды деяли, тогды укривжоный, одеръжавши листъ напоминалный о
вчиненье справедливости от суду належного, маеть оного деръжачого урядовне, яко в
томъ наука въ арътыкуле сорокъ осмомъ сего розделу естъ описано, обънести. А кгды бы,
деръжачы за листомъ упоминальнымъ, справедливости учинити не хотелъ, тогды и в
таковой крывде укрывъжоный дедича и заставника оного именья позвати маеть, ижъбы
самъ с тымъ деръжачымъ сталъ и тыхъ бояръ и людей, от кого крывда деетьсе будеть,
поставилъ, и далей на нихъ справедливости доводити маеть, яко в томъ же арътыкуле
сорокъ осмомъ сего розделу о ужыванье справедливости описано. Лечъ за крывды и
шкоды, от бояръ и подданыхъ такового именья починеныхъ и с права сказаныхъ,
держачому оного именья дедичъ з сумы его пры выкупенью ничого вытручати не маеть,
але на винныхъ боярехъ и подданыхъ того смотрети собе будеть. А хотя бы хто не толко
дедичное именье, але доживотное заставное и якимъ инымъ правомъ держачое, кому
иншому заставилъ, тогды таким же обычаемъ в крывдахъ, с такого именья вделаныхъ,
сужоно и росправовано быти маеть.
Артыкул 51.
Хто бы, маючи от кого именье аренъдою, в суседъстве кому кгвалтъ або шкоду
учинилъ.
Уставуемъ: где бы хто, маючи от кого именье собЪ арендованое, кому иному в суседъстве
з особы его самого або слугъ его такъ в кгвалтехъ, боехъ, грабежохъ, яко тежъ и
отнятьемъ и привлащеньемъ собе до такового именья якихъ кгрунтовъ або пожитковъ и в
ыншихъ якихъ речахъ шкоду вчинилъ, тогды укрывжоный, таковые шкоды осветъчивши и
оповедавшы урядовне, маеть з вечности самого пана того имЪнья позвати, выписавъши в
позве кривду свою, в чомъ се ему от того арендара с того имен[ь]я деяти будеть, жебы
Статут Великого княжества Литовского 1588 года [Электрон. ресурс]
Подг. О.Лицкевич. - Мн., 2002-2003.
http://starbel.narod.ru/statut1588.htm
самъ с тымъ арендаромъ сталъ и ему сЪ усправедливил. А тые позвы на том же имен[ь]ю
покладаны быти мают. Который позов держачый такового имен[ь]я винен будет пану
оного имен[ь]я, который ему его арендовал, ознаймити и з ним спольне до права
становитисе и в отказЪ быти. А урядъ будеть моцонъ за перевЪденьемъ правнымъ
отправу на томъ же именью, с которого ся кривда деяла, учинити. А панъ оного именья
тое сумы сказаное на арендару своимъ смотрети будеть, а отправе урядовой спротивен[ь]я
никоторого чинити не маеть. По тому жъ, где бы ся от бояръ и подъданыхъ такового жъ
именья, яко се вышей поменило, кому в суседъстве в чом колвекъ якие кривды деяли,
тогды укрывжоный, одеръжавшы листъ напоминальный о вчиненье справедливости от
суду належного, маеть оного жъ пана урядовне, яко в томъ наука въ арътыкуле вышнемъ
пятьдесятомъ того розъделу естъ описана, обнести. А кгды бы оный панъ або аренъдар за
листомъ упоминальнымъ справедливости учинити не хотелъ, тогды и в таковой крывде
укривжоный того жъ дедича оного именья позвати маеть, ижъбы самъ сталъ и тыхъ бояръ
и людей, от кого ся крывда деяти будеть, поставилъ, и далей на нихъ справедливости
доводити маеть, яко въ арътыкуле сорокъ осмомъ сего розделу четверътого о вживанье
справедливости естъ описано.
Артыкулъ 52.
О прыежъдчанью сторонъ на роки земъские и рочки кгродъские, также на судъ
подъкоморого и комисаръский безъ великое зкграе, и о роздаванью господъ.
Ижъ некоторые станы люди можные звыкли приеждчати до судовъ и врядовъ нашыхъ з
великими почты слугъ и приятелъ своихъ, за чимъ тежъ многие розницы, розрухи и
своволеньства межи людми деютьсе, а убожъшымъ людемъ и о господы а о покой передъ
таковыми трудно бываеть, прото уставуем и такъ мети хочемъ, абы на роки земские и
рочки кгродъские, также и до судовъ подъкоморъскихъ и комисаръских нихто якого жъ
колвекъ стану и достоеньства з великими непотребными почты слугъ и приятелъ своихъ,
также збройне и з гайдуками або драбы не приежъдчал, одно в почъстве меръномъ,
скромномъ, такой справе, ужыванью справедливости святое, прыстойномъ и потребном, а
панове рады нашы будуть мочы слугъ з собою мети водлугъ важности, достоенъства и
потребы своее. А господы на рокохъ земскихъ и рочкохъ кгродъскихъ врядъ кгродъский
маеть и повиненъ будеть роздавати, ведъ же первей врядъ судовый земъский, судью,
подъсудъка, писара, господами добрыми, которые они собе оберуть, опатрившы, и к тому
особный домъ престронъный, где на судехъ заседати мають, записати там, где еще дому
судового нетъ, потымъ господы иншымъ станом водлугъ уваженья особъ роздавати.
Артыкулъ 53.
О порадъку прыхоженья сторонъ до суду на врядехъ нашыхъ
земъскомъ и кгродъскомъ.
Хотечы мы, г[о]с[по]д[а]р, то мети, абы на врядехъ нашихъ, г[о]с[по]д[а]ръскихъ, у суду
земского и кгродъского порядокъ и скромность з учстивостыо пристойною захована была,
уставуемъ, ижъ кождая особа якого жъ кольвекъ стану, достоенъства до того дому албо
избы, где на судехъ вряды наши земский албо кгродъский засядут, не маеть перЪдъ судъ
приходити и упорне ся тиснути, ажъ кого з рейст[р]у до справы закличуть, и то не жадною
тижбою людей до тое избы судовое входити масть, толко наболей самъосмъ, то естъ самъ
с прокураторомъ а зъ шестьма приятелъ шляхътичами. Ведъ же если бы колко вчасниковъ
водлугъ позву до одное речы и справы тое жъ належало, тогды и тые войти мають. А тые
вси учасники толко одного прокуратора и шести шляхтичовъ мети могуть. А если бы
который упоръный, не будучы до справы заволаный або не маючы справы, до тое избы
Статут Великого княжества Литовского 1588 года [Электрон. ресурс]
Подг. О.Лицкевич. - Мн., 2002-2003.
http://starbel.narod.ru/statut1588.htm
судовое вшолъ, а, будучы от вряду напомненъ, выйти не хотелъ альбо в томъ дому
судовомъ воланье чинилъ, таковый кождый маеть быти виною дванадъцатма копами
грошей литовъскихъ каранъ, которую заразомъ подъ такою жъ другою виною, не сходечи
с права, суду тому заплатити повиненъ будеть, а заплативъшы, предъся вонъ выйти. А хто
бы тому былъ противенъ, а за сказаньемъ врядовымъ тое вины и за напомъненьемъ о
заплату ее до трехъ разовъ, а заплатити ее не хотелъ и упоръне от суду отышолъ, на такого
именью тая вина совито маеть быти заразомъ без складанья року черезъ тотъ же врядъ,
передъ которымъ ся то станеть, отправена, поступуючы в томъ далей противку упорного а
непослушного водлугъ арътыкуловъ [в оригинале: «арътылуловъ»] о отправахъ речей
сужоныхъ, в семъ розделе нижей описаныхъ. А если бы чый слуга або хто иный неоселый
в тую вину попалъ, таковый маеть быти на вряде нашомъ в замку або в дворе у везенью
задеръжанъ, поки тую вину заплатить. А не будеть ли чимъ мети заплатити, тогды место
платежу дванадъцать недель мает у везенью седети. А панъ кождый слуги ани приятеля
своего по праве и сказанью кгвалътомъ в томъ боронити и вряду у выконанью тое вины
противитисе не маеть подъ заплатою черезъ самого его такое жъ вины, веръху описаное.
А ижъ стороне позволено шестма шляхтичами прыходити до суду с тое причины, где бы
се стороне уближен[ь]е от вряду деело або чого в контроверъсыи и в декрете не
доложыли, абы укрывжоной пры сознанью возного сведЪцьством тыхъ шести
шляхтичовъ и присегою своею справы своее доводил, а урядъ возного до прыслуханья
справы и оповеданья всякого и противко собе самому не маеть стороне боронить. А хотя
бы возного противъ себе нЪ прыдали, тогды уже сторона пры сознанью тыхъ шляхтичов
присегою своею урядъ перЪконаеть ку поднесЪнью и знову слухан[ь]ю тое справы з
стороною у того суду, до которого будет водле права позвано, и где таковый неслушный
всказъ суду перъвшого будеть узнанъ. Вед же оный перъвшый урядъ, от которого ся такая
помылка станеть, никоторое вины и противного мниманья не понесет, але где возный
будеть прыданъ, тамъ вжо стороне присегати не будЪть потреба.
Артыкулъ 54. Яко стороны у суду за позвы заховатися мають, а судъ ижъбы з головы
ничого не судилъ.
Забегаючы тому, абы на врядехъ нашыхъ у суду кождого жалобы и отпоръ порадне без
сваровъ и непотребного забавенья и проволоки шли, такъ уставуемъ, ижъ напередъ
сторона поводовая, не чынечы словы жалобы, але вместо жалобы маеть дати на праве
позовъ чести и позву своего слушнымъ доводомъ подъпирати. А сторона позваная маеть
на тотъ позовъ, яко на жалобу, отказывати и справоватися. В которомъ споре, если бы
сторона поводовая што противного собе услышала, на што бы розмышленья потребовала,
тогды судъ на отступенье и пораду зъ ее приятельми маеть ей допустити надалей на одну
годину. А будеть ли и повторе тая жъ сторона узыченья часу на пораду просити, того судъ
ей и повторе боронити не маеть. Также на одну годину по тому жъ и обжалованой стороне
по двакроть одного дня толко, яко и поводовой стороне, розмышленья на часъ не маеть
судъ боронити, а болшъ того сваровъ и отволокъ судъ не маеть допущати. А кгды вже на
обе стороне справу свою передъ судомъ выповедають, а судъ земъский або кгродъский
потребовали бы сами собе в томъ розмышленья, тогды мають перъвей сторонъ
напоменути, абы все, што бы на праве покладати и оказывати або мовити мели, учинили.
А кгды вжо то все учынять и писаръ то спишеть, тогды вжо надъ то стороны ничого
большей прикладати не будуть мочи, ани судъ того приймовати и писати казати не маеть,
але судъ маеть ся намышляти. И если бы того дня або и назавтрее розмышлятися не
могли, и до третего дня то собе взяти на пораду и розмышленье могуть. А третего дня вжо
судъ конечное сказанье учинити будеть повиненъ водлугъ жалобы и отпору сторонъ,
Статут Великого княжества Литовского 1588 года [Электрон. ресурс]
Подг. О.Лицкевич. - Мн., 2002-2003.
http://starbel.narod.ru/statut1588.htm
ничого не прыкладаючы ани уймуючы. А в томъ часе, кгды ся судъ намышляеть, стороны
если бы хотели то собе взяти на вгоду и еднанье, тогды они имъ того боронити не мають,
а мы, г[о]с[по]д[а]ръ, также судъ головный, воеводове, старостове и врядники наши,
судья, подъсудокъ, и судъ замковый або дворъный и нихто иный ничого з головы и
домыслу своего, также и зъ ведомости своей судити и сказывати не мають и не будут
мочы, толко водлугъ сего статуту и арътыкуловъ, в немъ описаныхъ, и водлугъ мовенья и
споровъ у суду обеюхъ сторонъ. А где бы чого в томъ статуте не доставало, тогды судъ,
прихиляючыся до ближъшое справедливости водле сумненья своего и прикладомъ
иншыхъ правъ хрестияньскихъ то отправовати и судити маеть.
Артыкулъ 55.
О заступованью у суду одному за другого.
Тежъ уставуемъ, хотечы мети, абы такъ было на вси потомные часы, ижъ коли бы хто кого
другого о которую колвекъ реч поточную албо який колвекъ учинокъ и о выступокъ,
кромя имен[ь]я лежачого, о чомъ на иншыхъ местъцахъ естъ особливая наука, у которого
суду заступилъ, тогды тотъ вжо будеть повиненъ самъ безъ жадныхъ позвовъ на тотъ же
часъ за тою жъ жалобою, з суда не сходячы, за него отказывати и усправедливитися. А
заступованье инакшое быти не мает, толко очевисте у суду, а не через листы и
прокуратора. А ведь же кгды заступца въ якомъ выступку кого заступовати будеть, тогды
врядъ тотъ, передъ который се то прыточить, передъ заступцою маеть казати вычитати
тотъ позовъ и речъ тую, о што идеть, достаточне преложити. А кгды вжо заступца во
всемъ томъ позваного заступить и писаръ то запишеть, тогды позваный або обжалованый
от того воленъ. А поводовая сторона будеть о то с тым заступцою мовити и речи своее на
нем доводити. А листы, выписы и оповеданье, всЪ тое право и выводы, которые
поводовая сторона противъ обжалованое стороны в томъ праве мела, маеть противко тому
заступцы ити и у права местъцЪ мети такъ, яко и противъ обжалованому, и имя заступцы
за имя обжалованого будеть розумено. А заступца не маеть собе до повету, ани до суду
своего належачого, ани до пана своего, якого кольвекъ стану будучы чоловекъ, откладати
и брати, але повиненъ будеть самъ або при собе маючи прокуратора, того жъ часу, скоро
заступит[ь], отказывати и до конца усправедливитися. А естли бы на заступцы не оселомъ
в томъ поветЪ што у права сказано, тогды жалобная сторока, взявшы от того вряду листъ
судовый, маеть з нимъ ехати або слати умоцованого своего до вряду оного повету, где
тотъ заступца оселость свою в томъ паньстве нашом, великомъ князстве литовъскомъ,
маеть. А оный врядъ другого повету водлугъ того суда вряду оного маеть ему отправу
водълуг права посполитого на ономъ заступцы, правомъ переконаном, учинити. А до
оказанья оселости такого заступцы в ыншомъ поветЪ правомъ слушнымъ або
сведецьствомъ и признаньемъ черезъ листъ отвороный оного вряду присяглого судового,
в которомъ поветЪ оселость будеть менити, маеть быти у везен[ь]ю задержанъ в том же
замку або в дворЪ нашомъ судовомъ, где судъ былъ, если бы рукоемъство слушного
оселого в томъ поветЪ до сказанья оселости своее по собе не далъ. А на оказанье оселости
маеть врядъ тому заступцы часу слушного, яко бы моглъ зьездити, узычити. Ведь же гдЪ
бы заступца на горло былъ сказанъ, таки [так!] там же на томъ вряде, до его повету не
отсылаючи, каранъ быти маеть. А по отправу головщыны албо иншихъ шкод, на немъ
сказаныхъ, отослано быти маеть до инъшого повету, где оселость его будеть. А который
бы заступца згола не оселый в томъ всЪмъ паньстве, великомъ князьстве литовъскомъ,
былъ у права въ якой вине переконанъ, тотъ заразомъ на томъ же врядЪ маеть быти
каранъ и не спущонъ з уряду, поки всему сказанью врядовому досыть вделаеть. А если бы
ся то прыдало, жебы объжалованый, ставшы у суду, заступцу менилъ, але бы того
заступцы заразом у права ставити не могъ, менуючи его быти хорым обложною хоробою,
Статут Великого княжества Литовского 1588 года [Электрон. ресурс]
Подг. О.Лицкевич. - Мн., 2002-2003.
http://starbel.narod.ru/statut1588.htm
тогды ему маеть быти дано на поставенье заступцы до другихъ роковъ под такимъ
обовязкомъ и варунком, яко о хорыхъ вышей в семъ роздЪле естъ описано. Ведь же на
хоробе заступца тотъ виненъ будеть прысягнути.
Артыкулъ 56.
О злецЪнье речи и о данью моцы инымъ за себЪ у права мовити.
Уставуемъ тежъ, ижъ, где бы хто за позвы або на котором року прыпаломъ не могъ на
праве быти такъ за хоробою, яко и за инъшими которыми причинами и потребами своими,
тогды прокуратора албо умоцованого своего можеть уместо себе у права мети. А вед же
умоцованый або прокураторъ икакшый и иначей установянъ и у права прыймованъ быти
не маеть, ажъбы ему очевисто злетилъ речъ свою перЪдъ урядомъ которымъ колвекъ в
канъцляреи нашой, г[о]с[по]д[а]ръской, або передъ врядомъ земъскимъ и кгродъскимъ, и с
того вряду выписъ с книгъ маеть взяти и его тому прокуратору своему дати. А за
таковымъ врядовымъ злеценьемъ могуть быти прокураторми и не оселыми люди в томъ
паньстве, великомъ князстве литовъскомъ. А хто бы за хоробою своею або про далекость
вряду злеценья моцы на вряде сознати не могъ, таковый кождого стану чоловекъ маеть
речнику або умоцованому своему речъ свою ку мовенью у права злетити листомъ своимъ
отвороным, панове рады, даючы такие листы умоцованые толко подъ печатью своею и с
подъписомъ руки своее властъное, а инъшые станы такежъ, даючи листы подъ печатью и
с подъписью руки своее и при своей печати еще под одною печат[ь]ю ч[е]л[о]в[е]ка
сторонъного. А хто писати не умееть, тотъ пры своей печати еще двухъ шляхътичовъ
печати у такого листу своего умоцованого маеть мети и в томъ листе або выписе
врядовомъ, поменивъшы речы, о што идеть, остатокъ на позовъ указати и моцъ на зыскъ и
страту доложити. Ведъ же за таковою не врядовою моцъю умоцованый маеть быти оселый
в томъ паньстве нашомъ, великомъ князстве литовъскомъ, подъ нами, г[о]с[по]д[а]ремъ,
оселостью шляхетъскою. И такъ вжо токовые [так!] умоцованые у кождого вряду
прыймованы быти мають и моцъ мети будуть такъ до буренья року и позву, яко и до
мовенья в самой головной речы.
Артыкулъ 57.
Хто бы самъ не могъ або не въмелъ у права мовити и о приданью прокуратора
людямъ убогимъ.
Уставуемъ теж, если бы хто, очевисте у права стоячы, не могучы або не вмеючы самъ
мовити и речы своей справовати, поручылъ устне кому другому тую речъ свою мовити,
тогды судъ за злецен[ь]емъ устнымъ маеть его за моцного приняти, хотя и неоселого; ведъ
же гдЪ бы кому шло о горъло, або за записомъ таким, которымъ бы се хто описалъ, не
сходячы с права, досыть чинити, тогды таковая сторона, хотя и речъ кому иншому
злетивъшы, предъся от суду отходити не маеть до сконченья права. К тому, где бы хто, не
могучы и не умеючы самъ мовити и речы своее у суду справовати, а про убозство,
недостатокъ свой прокуратора самъ собе способити не мог, яко вдовы и сироты, а просили
бы вряду о прокуратора, тогды врядъ маеть таковому прокуратора даръмо прыдавати и
казати от нихъ у права мовити, и прокураторъ маеть в томъ уряду быти послушонъ. А
если бы прокуратор уряду в томъ послушонъ быти не хотелъ, таковому прокуратору и от
иншихъ особъ у того суду мовенье не маеть быти допущоно. А в ображенью маестату
нашого и мы, г[о]с[по]д[а]ръ, обецуемъ прокураторовъ стороне обвиненой давати, по тому
жъ и людямъ убогимъ и недостаточнымъ, такъ же ся и судъ головный противъ людей
убогихъ заховывати маеть.
Статут Великого княжества Литовского 1588 года [Электрон. ресурс]
Подг. О.Лицкевич. - Мн., 2002-2003.
http://starbel.narod.ru/statut1588.htm
Артыкулъ 58.
О прокурато[ро]хъ: якие особы и где не мають ими быти.
Уставуемъ тежъ, ижъ прокураторми тые особы, нижей описаные, быти не мають, то естъ
судья, подъсудокъ и писаръ земъский, такъже и врядъ кгродский. А то в тыхъ поветехъ и
пры тых судехъ, где суть сами врядниками. Ведъ же у своихъ власныхъ речахъ и в тыхъ
поветехъ могуть мовити и справедливости собе доводити, а в поветехъ и в судехъ иншых,
где не суть врядниками тые особы, веръху мененые, гдЪ бы се кому с потребы трафило, и
от кого инъшого с приятелъ своихъ мовити могуть, а таковые за прокураторы розумены
быти не мають. Не могуть тежъ быти прокураторъми особы духовъные, одно такъ же въ
своей власной речы кождому з нихъ вольно будеть у права мовити.
Артыкулъ 59.
О каранью фалшывых а потъступных прокураторовъ, и к тому, иж волно стороне
прокуратора своего у права подъпирати, и самому мовити, и другого прокуратора на
его местъце установити.
Уставуемъ, ижъ кгды бы который прокураторъ, поднявшыся кому речъ его мовити и
справовати, а выведавшися на немъ тое справы и листовъ его огледавшы, выдалъ его в
томъ стороне противной або до тое стороны противное прысталъ и от нее засе напротивко
тому, кому ся первей обецалъ и поднялъ речъ мовити, тогды таковому не маеть быти
мовенье у права допущоно. К тому если бы хто кольвекъ, хотечы кому ку шкоде учинити,
а прокураторомъ се установилъ и листъ от него умоцованый справил, а того бы ему
сторона не поручила, и за тымъ што бы кому утратилъ, таковый судъ не маеть быти
держанъ. Такъ тежъ прокураторъ, чынившысе на которомъ року хорымъ, а стати бы на
другомъ року и присегнути не хотелъ водле артыкулу шестьдесятого, нижей в семъ же
розделе описаного, тогды за таковые поступки такие прокураторы, кгды то на нихъ
явнымъ и слушнымъ доводомъ переведено будеть, горломъ карани быти мають. А где бы
тежъ прокураторъ, поднявшися кому речы мовити, а потом тому досыть не учынилъ албо
умысльне ку шкоде кому што у права недъбальствомъ своимъ упустилъ, тогды за тое на
везен[ь]е шляхетъское на чотыри недели маеть быти сказанъ, а шкоду стороне, в чомъ
уближенье учинилъ, платити маеть, о што там же заразомъ, где се то прыдасть, безъ позву
стороне жалобливой усправедливитися повиненъ будеть. А хто бы тежъ, у права самъ
стоячи, хотелъ отставити прокуратора своего, а самъ свою реч мовити або другому
прокуратору злетити, то ему волно будет.
Артыкулъ 60.
Прычины нестанья прокураторовъ, ижъ то имъ, сторонамъ ихъ шкодити не будеть.
Тежъ уставуемъ, ижъ кгды бы прокураторъ передъ рокомъ права, не могучи стороне своей
о хоробе своей дати знати, ижбы иншого на его местце послалъ, або, едучи вжо на дорозе
албо и на местцу будучи, где роки отправуют, рознемогъся обложною хоробою такъ,
жебы на рокъ до суду самъ быти не могъ, тогды такъ стороне той, чию справу на себе
взялъ в речахъ тыхъ, такъ тежъ и прокуратору ничого шкодити не маеть. А хотя бы другие
роки остатъние або рокъ завитый былъ, предъсе тымъ ничого тратити не будеть. А ведь
же прокураторъ в той хоробе скоро се рознеможет, маеть до вряду того, до которого была
его сторона з моцъю отправила, и тежъ стороне противной дати знати, а объмогшися
потомъ на перъшых рокохъ земъскихъ або рочкохъ кгродских, перед которым судомъ тая
справа точытися будеть, маеть прысегнути, ижъ справедливе за обложною хоробою на
тотъ часъ становитися не могъ, а не ку зволоце справедливости. Такъ тежъ слуги и
Статут Великого княжества Литовского 1588 года [Электрон. ресурс]
Подг. О.Лицкевич. - Мн., 2002-2003.
http://starbel.narod.ru/statut1588.htm
пасланцы [так!] от пановъ, которыхъ бы до суду на роки посланых зъ якою обмовою
правною у дорозе або и на местъцу судовомъ хороба великая обложная зашла, по тому жъ
будеть ся заховати повинъни, яко вышей описано. А ведь же если бы прокураторъ албо
слуга, посланець таковый о хоробе своей давати ведати, або и давши вряду на перъшихъ
рокохъ ведати, а потомъ на другихъ рокохъ, на том же вряде черезъ сторону свою
постановенъ не былъ, албо пакъ и ставшы, а прысегнути на томъ, ижъ за хоробою на
перъвшыхъ рокохъ не становилъся [в оригинале: «не станововился»], не хотелъ, тогды
вряд на перъвшыхъ рокохъ за неданьемъ знати о хоробе, такъ тежъ на другихъ за
невчиненьемъ такое прысеги маеть стороне противной сказанье чинити водлугъ сего
статуту. Инъде такая объмова хоробою прокураторъскою албо которого посланьца
станеться у суду земъского за позвы перъвшыми на року перъшом не завитомъ, а потомъ
на другихъ рокохъ такий прокуратор альбо посланецъ ставленъ не будеть, або и ставшы,
не присягнеть, тогды тая сторона за оные перъвшые роки земские нестаное такъ, яко бы
самъ не сталъ, заплатити, а стороне своей противной вжо на тыхъ другихъ рокохъ, яко на
завитомъ року, усправедливитися будеть виненъ. А будет ли такая обмова хоробою
вчинена на якомъ року завитомъ, такъ земъскомъ, яко и кгродъскомъ, а на другихъ рокохъ
такий прокураторъ або посланецъ не станеть або и ставши не присягнеть, тогды таковая
сторона за оное перъвшое нестанье свое на року завитомъ речъ, о которую позовъ идеть,
тратити маеть без жадныхъ доводовъ стороны своее противное. А пакли бы сторона
позваная поведила, ижъ тотъ прокураторъ его, от него посланый, передъ тымъ рокомъ, не
доехавши того вряду, умеръ, тогды сама сторона таковая, не могучы вжо за тымъ того
прокуратора своего на другомъ року становити, маеть на томъ самъ присегнути, ижъ тотъ
прокураторъ его на тотъ рокъ былъ от него посланъ, а онъ, не доехавъшы того вряду,
умеръ. И кгды на том присягнеть, судъ маеть ся противко ему водле сего арътыкулу
заховати. А естли бы сама сторона позваная на другомъ року не стала албо ставъши на
томъ присегнути не хотела, тогъды, естли бы о завитый рокъ шло в той речы, вжо на томъ
другомъ року упадываеть; а естли не о завитый рокъ - тогды в нестанъное упадываеть.
Артыкулъ 61.
Чого прокураторъ без стороны своее справовати не можеть.
Тежъ уставуемъ, ижъ прокураторъ за моцъю жадныхъ записовъ новыхъ и никоторого
вызнанья ни от кого не маеть у суду чинити и п[е]н[е]зей за записами брати, и з нихъ
квитовати, не маючы при собе стороны своее. А ведъ же естли бы хто, не могучы або не
поспеючы до вряду ехати по пенези, хотелъ черезъ кого иного пенези тые брати и
квитовати, тогды иначей не маеть, ани можеть брати, только через такового прокуратора
або слугу своего, кому бы особливую на то моцъ и порученье листомъ своимъ,
подъписанымъ рукою своею и подъ печатью своею далъ, албо передъ врядомъ близшимъ
судовымъ поручилъ и выписомъ того вряду моцнымъ его на то меновите учинилъ;
таковый моцный можеть пенези брати и квитовати моцъ мети будеть.
Артыкулъ 62.
Хто бы на кого передъ правомъ словомъ або рукою сягнулъ, пхнулъ, або ранилъ,
або забилъ.
Тежъ уставуемъ: коли бы хто, якого колвекъ достоенъства и стану будучы, а стоячы
передъ судомъ, отступившы речи своее, одинъ на другого словомъ ся неучъстивымъ
торъгнулъ, тогды за то маеть з сказанья того суду место вины седЪти на замъку
ближшомъ шесть недель. А если бы пхнулъ або рукою ударил, хотя бы не ранилъ, тогды
маеть заплатити стороне место навезки кгвалту дванадъцать рублей грошей, и за вину
Статут Великого княжества Литовского 1588 года [Электрон. ресурс]
Подг. О.Лицкевич. - Мн., 2002-2003.
http://starbel.narod.ru/statut1588.htm
маеть седети шесть недель. А если якую справу у того суду мети будеть тотъ, кто таковое
везенье заслужить, тогды маеть то везенье подняти по росправе своей речи. Пакли бы
корда, меча албо шабли и якое колвекъ брони в обычай звады добылъ, а хотя бы и не
ранилъ, руку тратить. А кгды бы ранилъ, тогды ничимъ инъшимъ, одно горломъ маеть
быти коранъ [так!] и о такий учинокъ кождый врядъ, будь кгродский або земъский, перед
которымъ се то станеть, такового можеть на горло сказати. А если бы хто кого передъ
судомъ забилъ, тотъ честь и горло тратить, а головъщина з ыменья або маетности его
совито маеть быти детем або близъскимъ плачоно. А такового явного выступцу пры
горачом учинку не толко врядъ тотъ повинъне имати казати маеть, але и всимъ тамъ
будучымъ для завъстегненья такового своволеньства, яко против взрушителя покою
посполитого повъставшы, противъ таковому помочъ чынити волно будеть. А где бы
таковый, змоцнившися, имати себе не далъ и от вряду зышолъ, тогды противъ таковому
вряды наши заховатися мають водлугъ артыкулу трыдъцать второго сего жъ розделу. Вед
же хто бы своволне далъ прычину словы и рукою и початокъ учинилъ, а тотъ бы, ув
обороне прымушоный, початкомъ его брони добылъ, ранилъ або забилъ, таковый за
выводомъ слушнымъ иманъ быти не маеть и таковое покуты и каранья не виненъ
теръпети. А хъто бы тежъ кольве, ранившы албо забившы кого передъ судом, прочъ утекъ,
по такового за даньемъ намъ о томъ знати черезъ тотъ врядъ нашъ, передъ которымъ бы ся
то стало, маемъ казати манъдат нашъ дати, и станет ли за манъдатомъ, карати его водлугъ
сего арътыкулу. А естли за мандатомъ нс станеть, тогды его маемъ казати со всихъ
паньствъ нашихъ выволати вечнымъ выволаньемъ, яко бы ся николи в границы паньства
нашого не ворочалъ, а ранъному навезъка, або забитого головщина з ыменья его маеть
быти плачона. Где бы тежъ хто такъ упоръный былъ, жебы, не росправившисе в такой
речи, прочъ уехалъ албо за сказаньемъ врядовымъ везенья подъняти и кгвалту верху
менованого стороне обельжоной заплатити не хотелъ, а врядъ бы его не могъ до того
везенья примусити, а онъ бы проч от вряду от[ъ]ехалъ, досыть тому, во што попалъ, не
вделавшы, тогды тотъ урядъ, передъ которымъ ся то станеть, за такое его
непослушеньство маеть стороне ображоной кгвалтъ тотъ совито, а собе вряду вины
сорокъ копъ грошей на имен[ь]ю его заразомъ, безъ жадныхъ роковъ, отправити,
поступуючи далей около тое отправы водлугъ артыкуловъ, о отправахъ речей сужоныхъ
описаныхъ.
Артыкулъ 63.
О томъ, где бы воевода, староста або судья, подъсудокъ и писаръ, такъ замъковый,
яко и земъский врядъ або подкоморий, комисаръ, седечы на суде, кого соромотилъ,
або ся на кого рукою торъгнулъ.
Тежъ уставуемъ, ижъ кгды бы хто с тыхъ вышей мененыхъ врядниковъ нашихъ, седячы на
суде, кого словы неучъстивыми соромотилъ, тогды тотъ такий врядникъ за доводом
явным слушнымъ маеть на замъку шесть недель седети. А если ж бы который воевода,
староста або который зъ ихъ врядняков судовыхъ кгродъскихъ, албо тежъ судья,
подъсудокъ, писаръ земъский, або подъкоморый, альбо комисаръ сам кгвалтъ местъцу
нашому, г[о]с[по]д[а]ръскому, и суду учинилъ, а кого на суде ранилъ, таковый врядникъ
горъло тратить. А пакли бы забилъ, таковый горъло и честь тратить, а навезка або
головщина зъ именья его совито маеть быти плачона. А о то укрывжоной стороне такого
врядника волно будеть позвати на рокъ завитый до насъ, г[о]с[по]д[а]ра. Ведъ же хто бы
свовольне далъ вряду причину, словы и рукою торъгнулъся и початокъ учинилъ, а тотъ
врядникъ, въ обороне прымушоный, початкомъ его брони добылъ, ранилъ або забилъ,
таковый за слушнымъ выводомъ от тое вины и каран[ь]я воленъ будеть.
Статут Великого княжества Литовского 1588 года [Электрон. ресурс]
Подг. О.Лицкевич. - Мн., 2002-2003.
http://starbel.narod.ru/statut1588.htm
Артыкулъ 64.
Естли бы хто, на роки земъские або рочки кгродъские томъ повете, где естъ
оселымъ, прыехавшы, а часу отправованья роковъ кого зранилъ, кгвалтъ або шкоду
якую учинилъ.
Варуючы кождому волный беспечный прыступъ до справедливости, уставуемъ то, ижъ
если бы хто жъ кольвекъ, будь оселый албо неоселый, на роки земъские або на рочки
кгродъские в тотъ поветъ, где суды будуть, прыехавшы, и часу того, поки роки водле
замеренья сего статуту трвати будуть, то естъ личачы тот часъ передъ зачатьемъ роковъ за
три дни, а по выволанью роков черезъ три дни, кого, будь на дорозе едучого на роки або в
месте томъ, где ся суды отправують, на улицы и где кольвекъ потъкавъшы и перенявъшы,
албо на господу и якое становище кгвалътомъ нашедъшы, самого або слугу его и кого
кольвекъ с таковыхъ ранилъ або забилъ, будь тежъ только шкоду якую учинилъ, або
пофалъку на здоровъе або пожогу вделалъ, а укрывжоный того жъ часу утекъ бы ся до
суду и то ожаловалъ, тогъды тотъ врядъ, подъ которого отправованьемъ справъ судовых
то ся станеть, маеть обжалованого вознымъ обослати, абы онъ, не зъеждчаючы з оныхъ
роковъ прочъ, передъ онымъ судомъ сталъ и в томъ ся жалобной стороне усправедливилъ,
который без позвовъ виненъ будеть стати и того жъ часу на тых же рокох
усправедливитися.
А сторона жалобная таковому обвиненому, если того потребовати будеть, жалобу свою на
писме черезъ возного подъ печатью своею або под печатью возного дати маеть, а
обвиненый потом третего дня о то, в чомъ ему вину дадуть, усправедливитися будеть
виненъ. Естли ж бы по заказанью черезъ возного, не становечися передъ врядомъ ку
росправе, прочъ зьехалъ, тогды тотъ врядъ кгвалтъ, навезки, раны и шкоды совито на
токовом, а будет ли выступокъ крвавый, тогды и на горло его за доводомъ слушнымъ
всказати а на выволанье до насъ, г[о]с[по]д[а]ра, отослати мает. А за кгвалтъ, раны, шкоды
або головщину заразомъ отправу на именью его вчинити. А не будет ли очевисте
пристегненъ и зазванъ, тогды таковый за прыпозваньем стороны жалобное передъ тот же
врядъ, под которымъ ся што станеть, на перъвшие роки на рокъ завитый будеть виненъ
становитися. И станет ли, а за доводомъ слушнымъ правнымъ стороны жалобное
покажетъ ли ся в томъ виненъ, таковое жъ сказанье, яко вышей описано, противъко нему
чинено быти маеть. А не только врядъ кгродъский, але и земъский врядъ в такой речи,
што се подъ роками земъскими межы сторонами в речи крвавой станеть, будеть мочи и
шляхтича о горло судити и сказовати. А естли бы и за позвы безъ причинъ правныхъ не
сталъ, тогды врядъ для непослушенъства его вжо без доводу то, о што жалоба будеть на
немъ, въсказати и отправу на именью его водлугъ сего статуту учинити, а в речи крвавой
самого на выволанье до насъ отослати маеть. А неоселый у великом князстве литовъскомъ
кто кольвекъ, если бы збытокъ який под тымъ верху менованомъ часомъ учинилъ,
таковый, хотя бы и п[а]на у себе менилъ, не допущаючи ему до него отозву, тамъ заразомъ
черезъ тотъ же врядъ моцне сужонъ и водлугъ выступку своего сказыванъ и каранъ быти
маеть, выймуючы то, ижъ естли бы што пры бытности пана своего под тымъ же врядомъ
або на дорозе учинилъ, тогды панъ его за обосланьемъ врядовымъ через возного там же
заразомъ справедливость укрывжоному передъ вознымъ учинити повиненъ будеть. А где
бы панъ за обосланьемъ врядовымъ заразомъ справедливости не учинилъ, тогды на самом
пане такового слуги укривжоному за доводом, в статуте описанымъ, всказанье в той речи
обычаемъ, в семъ артыкуле помененым, чинено и отправа на именью его делана быти
маеть.
Статут Великого княжества Литовского 1588 года [Электрон. ресурс]
Подг. О.Лицкевич. - Мн., 2002-2003.
http://starbel.narod.ru/statut1588.htm
Артыкулъ 65.
Ижъ запозваныи словы непотребными, такъ тежъ и иный з стороны,
прыповедавшисе с правомъ своимъ, кромъ позву, не маеть права розрывати.
Уставуемъ: если бы позваная сторона, будучы у права, а отступивъши от позву, стороне
поводовой што такового нового задала або тежъ хто иный до того се стороны с правом
своимъ приповедал, хотечи право розоръвати [в оригинале: «розоръоати»], а проволоку
вчинити або собе што безъ позву правомъ выйграти, таковымъ сторонамъ то у суду ити не
можеть, але маеть судъ, отложивши то на сторону, предсе стороне поводовой
справедливость чинити водле позву о то, о што кого позвала, и то кончити и сказанье
чинити водле права. А тому третему, который бы се зъ стороны до тое жъ речы зъ
справомъ [так!] своимъ прыповедалъ, судъ, не припущаючи его заразъ ку праву, маеть ему
толко вперодъ волное мовенье до права в той речы заховати с тымъ, хто з выроку ихъ при
имен[ь]ю або которой речы зостанеть. А в ыншыхъ припалыхъ речахъ, которые бы се
ново межы тыми двема, за позвы у права стоячыми, прыточили, судъ маеть имъ сказати,
абы ся о то на иншие роки до суду належачого позывали. А естли бы ся што такового
межи ними о почъстивость дотыкало, судъ маеть ихъ обеюхъ сторонъ на вырокъ нашъ,
г[о]с[по]д[а]ръский, отослати на съемь вальный, и тамъ на сойме обедве стороне безъ
жадныхъ позвовъ мают ся передъ нами, г[о]с[по]д[а]ремъ, ставити ку росправе, а о што ся
запозвали, то предъсе судъ маеть судовъне межы ними росправовати и кончыти водлугъ
права.
Артыкулъ 66.
Яко братью неделную або вчасниковъ, то естъ себровъ, позывати.
Уставуемъ: естли бы колько братьи або участниковъ деръжали одно именье себреное,
люди тяглые або данъные неделеные, а кому бы се от того именья и людей кривда деяла в
чомъ колвекъ, а они бы яко з себе, такъ и с таковыми людми справедливости чынити не
хотели, ино естли от подъданыхъ, тогды жалобливая сторона листъ урядовый черезъ
возного на томъ именью положити маеть, абы ся той жалобливой стороне справедливость
стала. А естли бы ся в томъ стороне жалобливой справедливость не стала, тогды якъ о
вчыненье справедливости с подъданыхъ, такъ теж, естли и от самыхъ особъ крывъда якая
будеть деять, всихъ учасниковъ о то передъ судъ одънымъ позвомъ маеть позвати и на
томъ же именью позовъ положити. А хотя бы ся оны учасники вси не зъехали, тогды суд
на рокохъ судовыхъ будеть сказанье подле права на именью чынити водлугъ того, яко о
томъ о рокохъ судовыхъ написано.
Артыкулъ 67.
О крывдахъ, которые бы ся кн[я]земъ, паномъ, шляхте и ихъ слугамъ и подъданымъ
от воеводъ, старостъ, деръжавецъ и тивуновъ, лесничыхъ и мостовничыхъ нашихъ,
от ихъ особъ або от врядниковъ ихъ, будь тежъ от подъданых нашыхъ деяли.
Хотячы мы, г[о]с[по]д[а]ръ, в томъ панстве нашомъ, великомъ князъстве литовъскомъ,
покой посполитый чиненьемъ прудкое и латвое справедливости розмножати, уставуемъ,
ижъ кому бы се з обывателей того паньства — княземъ, паномъ, шляхте такъ стану
духовного, яко и светъского и тежъ ихъ слугамъ, бояром и подъданымъ — деяли якие
крывды и шкоды в речахъ поточных, в кгвалътехъ, боехъ, грабежохъ и в захоженью
людей отчызныхъ до местъ и селъ нашыхъ, г[о]с[по]д[а]ръскихъ, и иныхъ тому
подобныхъ от воеводъ, старостъ, деръжавецъ, войскихъ и тивуновъ, лесничых,
мостовничыхъ и иныхъ врядниковъ нашыхъ, будь от самыхъ особ або ихъ врядниковъ и