Статут Великого Княжества Литовского 1588 года
Подождите немного. Документ загружается.
Статут Великого княжества Литовского 1588 года [Электрон. ресурс]
Подг. О.Лицкевич. - Мн., 2002-2003.
http://starbel.narod.ru/statut1588.htm
псовъ брати, ани рогатинъ, ани жадъное стрелбы, чымъ бы мелъ зверу шкоду вчынити, але
бортники толко мають мети сокеру а пешню, чымъ бы борть робити. А к сеножатямъ ити
толко зъ секерами, чымъ заросли ростеребити, а с косою, чымъ ее косити. А вед же тымъ,
которые озера мають в чыей пущы, кгды приедуть зиме озеръ своихъ волочити, волно имъ
дровъ с тое пущы к лазнямъ своимъ взяти и корыта на рыбу вделати. А тымъ, которые
сеножати мають, вольно на стырьту албо на стогъ або одърыну учынити, албо огородити.
А бортникомъ волно на лезиво лыкъ албо лубья на лазбень и на инъшые потребы, што
бортникомъ на потребы ихъ борътницкие прислухаеть, тыле, иле имъ потреба будетъ,
възяти што можеть на собе занести, а не возомъ вывезти.
А кгды дерево, в которомъ борть ихъ будеть, обалитъся со пъчолами або и безъ пчолъ,
волно имъ улей з бортью выпустити и вывести, а веръховъе и корен[ь]е оставити в пущы
тому пану, чыя пуща будет. А дерева на будованье и дровъ за тыми ихъ входы нихто с
чужое пущы брати не маетъ, нижли хто маеть здавна озера, сеножати и борти в чыей
пущы, тогды озеръ, сеножатми а бортьми чужое пущы взяти не можеть.
А тотъ, в чыей пущы озера, сеножати и боръти будуть, такъже тыхъ чужыхъ входов в
своей пущы отняти не можеть. А кгды пущу свою ростеребливати всхочеть, не маеть
борътямъ и дереву борътному жадное шкоды чынити. А если бы хто, ниву
розробливаючы, чые дерево борътное або на борть вделаное кремленое або со пчолами,
або и без пчолъ, очеръ або пожаромъ опалилъ и шкоду якую тому дереву учынилъ, с чого
бы тое дерево мело схнути, тотъ тому, чыему дереву шкоду учинилъ, за то повиненъ
будеть платити подле уставы нашое, нижей описаное. А кгды на чыемъ поли чужое дерево
борътное будеть, тотъ, оручы тое поле свое, не маеть чужого дерева борътного близко
подъорывати такъ, яко бы от сохи осномъ дерева досегнути не могъ. А если близко тое
дерево подъореть, а тое дерево для того усхнеть, тогды тотъ повиненъ будеть за тое
дерево платити подле уставы, нижей описаное. А хто бы таковую пущу розробилъ,
предъсе давнихъ уходниковъ от борътей, озер, сеножатей отбивати не маеть, а они тежъ,
ходечы до тыхъ уходов, збожъю никоторое шкоды чынити не мають.
Артыкулъ 4.
Хто бы чужые озера у своей пущы поволочылъ.
Уставуем: хто бы чюжие озера у своей пущи поволочилъ, тогды мает тому, чие озеро
будет, кгвалтъ платити и за рыбу, на чом тот панъ смети будет присягу вчинити, што ему
в рыбе шкоды станет, досыть уделати. Также если хто чюжые сеножати у своей пущы
кгвалтом покосити [так!] и, вытискаючи того от его сеножати, бой учинил, тогды будет
повинен кгвалту платити дванадцат рублей грошей и битых навезати. А если не будет
бою, а хотя сеножати чужые покосит або кошоное поберет, тогды повинен будет сено з
навезкою платити водлугъ уставы, в сем статуте нижей описаное.
Артыкулъ 5.
Хто бы застал чиего ч[о]л[о]в[е]ка въ своей пущи и пограбил.
Коли бы хто у своей пущи и въ яком колвекъ лесе, в бору, гаи, дубровах и иных зарослях
застал чыего ч[о]л[о]в[е]ка рубаючи або везучи дерево, або, следом за ним идучы, на
дорозе погонил и пограбил, тогды с тым грабежом тотъ, хто пограбит, воленъ будет того
ч[о]л[о]в[е]ка або тых людей, колько их с таким деревомъ поймает, вести до своего дому,
а тому пану земенину, чие люди будуть, або его вряднику мает з однымъ ч[о]л[о]в[е]комъ
стороннымъ то ознамити [так!] надалей третего дня, абы на паруку грабежъ и тыхъ людей
Статут Великого княжества Литовского 1588 года [Электрон. ресурс]
Подг. О.Лицкевич. - Мн., 2002-2003.
http://starbel.narod.ru/statut1588.htm
взялъ и на пень выехалъ. А тотъ панъ або врядъникъ маеть с тымъ, што пограбилъ, на
паруку тотъ грабежъ и люди взявъшы в такомъ обовязку, ижъ што на пню осужоно
будеть, то стороне укривжоной заплачоно быти маеть, и на пень по паруце назавтрее
выехати и заразомъ справедливость о тую шкоду в порубанью дерева учынити. И тотъ,
хто пограбилъ, маеть шкоды своее водлугъ права доводити самъ, звлаща в речы великой, а
в меншой шкоде до десети копъ грошей черезъ сторожовъ своихъ лесныхъ, и если тое
шкоды своее доведеть, тогды то ему плачоно быть маеть шацункомъ, в семъ статуте
описанымъ. А где бы хто, взявъшы грабежъ, на паруку на пень не выехалъ або и
выехавъшы, а справедливости не учинилъ водле права, тогды возный з двема шляхтичы
мають тую шкоду ошацовати, а укривжоный того на паручнику, а паручникъ на томъ, по
комъ ручилъ, правне доходить маеть. А будет ли ся кому в пущы або в лесе шкода не
стала, а онъ безвинъне пограбил, тотъ маеть чоловека пограбеного и грабежъ навезати и
самый тотъ грабежъ верънути. А хто бы за обосланьемъ грабежу на паруку взяти и на пень
выехати и росправы о то приняти не хотелъ, але бы еще противъ того грабеж противной
стороне учынилъ, тогды такий свой грабежъ тратить, а то, што такъ упорне пограбилъ, з
навезъкою виненъ будеть верънути и вины тры рубли грошей заплатити. А если се
сопруть о кгрунтъ, тогды о томъ мають з собою правне чынити передъ судомъ належным.
Артыкулъ 6.
Хто бы мелъ споръ о боръти або о входы в пущу.
Тежъ уставуемъ: хто бы мелъ споръ о борти або о въходы у пущы, а хотелъ хто кого от
бортей и от входовъ вытискати, а яко бы колвекъ чые борти або входы хто завелъ в чужые
руки, яко того много ся дееть межы мужыковъ, ижъ пчолы для недостатку дани продаеть
або по дочъце дасть зятю дерево зо пчолами у чужое село, а тымъ забираньемъ свары и
неупокой межы суседы деются, а оный, на тые пчолы знамена свои положывшы, за тыми
знамены новыми входы в тую пущу мети будет, и зася того первшого, хто бы первей был
тыхъ входовъ в держан[ь]и, з нихъ вытискалъ, а споръ о томъ былъ, тогды маеть судъ
знаменъ в дереве казати заколоти, и чые старъшое и врослейшое знаме будеть, тому
боръти и входы сказати маеть. А тые, хто будеть ново знамена свои у чужый островъ
внесли, не мают ся в то вступовати, а шкоду дерева колотого маеть заплатити водлугъ
уставы, нижей описаное. И вжо от того часу хто бы с подданых нашыхъ, такъ тежъ
подъданыхъ князскихъ, паньскихъ и земяньскихъ дерево борътное за границу пановъ
своихъ отдавъшы даровалъ и якимъ кольвекъ обычаемъ у чужые руки заводил, такового
маеть панъ его карати водлугъ важности выступу, а тое дерево зася тому пану маеть быти
приверънено, чые первей было.
Артыкулъ 7.
Хто бы кому озеро албо ставъ, або сажовъку зволочилъ, або млынъ зжогъ.
Тежъ уставуемъ: если бы хто кому озеро або ставъ, або сажовку зволочилъ, або ез, сежъ,
будь тежъ гатъ який порубалъ або розметал, таковый оному маеть заплатити кгвалтъ
дванадцать рублей грошей, а шкоду предся оправити. А пакли бы млынъ сказилъ або
греблю перекопалъ, або млынъ зжогъ, а в том бы оный шкодовалъ, ижъ млынъ стоялъ, а
пожитку ему з млива не было, або теж став выпустилъ, на што слушный довод учинить
або присегою телесною потвердить, таковый маеть платити кгвалтъ дванадцат рублей
грошей и шкоды або замешканье млива за слушнымъ доводомъ оправити. А млынъ будет
ли скажонъ, тот же, хто будеть сказил, знову своим накладомъ збудовати, а если бы не
хотелъ будовати, а былъ бы о то знову позванъ, тогды маеть на немъ заплата пенежная
Статут Великого княжества Литовского 1588 года [Электрон. ресурс]
Подг. О.Лицкевич. - Мн., 2002-2003.
http://starbel.narod.ru/statut1588.htm
сказана быти водлугъ важности оного будованья и пожытку, на што доводъ учиненъ
будеть. А вряд заразом, без складанья року, маеть за то отправу на виноватомъ учинити.
Артыкулъ 8.
О гнездо соколье або лебединое.
Уставуемъ: хто бы кому соколье гнездо сказилъ або подрубалъ, або умысльне соколы под
гнездомъ помкнулъ, або з гнезда соколы молодые побралъ, а то будеть на него водле
права слушне переведено, тогды тому, в чией пущы тое гнездо скажено, маеть заплатити
шесть рублей грошей. Тымъ же обычаемъ, кгды бы хто з лебединого гнезда яйца побралъ
або гнездо розметалъ, тогды за лебединое гнездо, хто сказилъ, маеть заплатити три рубли
грошей. А хто бы переве[с] [в оригинале: «перевел»] кому другому порубалъ або сеть
перевесную скралъ, маеть заплатити шесть рублей грошей, а за сеть копу грошей
заплатити.
Артыкулъ 9.
О бобровые гоны.
Тежъ уставуемъ: если бы князкие [так!], панские або змянские [так!] были гоны бобровые
давные звечные у иншого суседа дедизне, ино оный панъ, в чыей дедизне будуть гоны, не
маеть самъ ани людемъ своимъ допустить старого поля доорати такъ далеко, яко бы от
зеремени могъ киемъ докинути. Такъже далеко и сеножати подъкосити не маеть и лозы
теребити. А если бы подъ зеремена подъоралъ або сеножати подъкосилъ, або лозу
подърубал, а тымъ бобры выгонилъ, таковый маеть платити дванацат [так!] рублей
грошей, а тому зеремени предсе маеть упокой дать такъ далеко, яко бы могъ киемъ
докинути. Пакли бы хто кгвалътомъ бобры побилъ або злодейскимъ обычаемъ выкралъ,
таковый маеть кгвалтъ платити, а колко бы бобровъ убилъ, тогды маеть платити за
чорного бобра чотыри копы грошей, а за карого - две копе грошей. Пакли бы бобръ с того
старого зеремени вышолъ, а пришолъ ново в ыншое зеремя на кгрунтъ и берегъ иншого
пана, тогды в чыемъ кгрунте [в оригинале: «кирунте»] зеремя будеть, тому тежъ и ловенье
бобровъ належати маеть.
Артыкулъ 10.
О хмелищахъ.
Хто бы кому хмелища подралъ або порубалъ у чыей дедизне, а то на него слушнымъ
доводомъ переведено будеть, таковый мает кгвалту платити дванадцать рублей грошей. А
если бы дерева не посекъ, толко хмель подралъ, то маеть тры рубли грошей заплатити.
Артыкулъ 11.
О принадахъ пташыхъ.
Хто бы учынилъ принады на птахи на своемъ кгрунте власном а другий бы тые принады
кгвалтовне порубалъ и попсовалъ або птахи принажоные отогналъ, або на готовыхъ
чужыхъ принадах помъкнулъ, половилъ, а то бы на него слушне въ праве переведено, тотъ
маеть тому заплатити, чые прынады, шесть рублей грошей и птахи половъленые
заплатити ценою, в семъ статуте описаною.
Статут Великого княжества Литовского 1588 года [Электрон. ресурс]
Подг. О.Лицкевич. - Мн., 2002-2003.
http://starbel.narod.ru/statut1588.htm
Артыкулъ 12.
Хто бы прынады злодейскимъ обычаемъ показилъ.
Тежъ хто бы чые прынады злодейскимъ обычаемъ показилъ, дегтемъ або чоснокомъ
подъмазалъ або чымъ кольвекъ попсовалъ, а переведено бы то на него правомъ, тогды
маеть заплатити тому, чые принады, тры рубли грошей. Тымъ же обычаемъ хто бы кому
шатер тетеричый або сеть куропатьнюю на прынадахъ укралъ, тотъ маеть заплатити вины
три рубли грошей, а за шатеръ тетеричый заплатить три рубли грошей, а за куропатьвюю
[так!] сеть рубль грошей.
Артыкулъ 13.
Устава дереву бортному.
Хто бы чужое дерево бортное со пчолами, сосну або дубъ або иншое дерево бортное
сказилъ, корень у земли урубалъ або пожаром ожогъ, або яко кольвекъ неумысльне с
пригоды попсовалъ, тотъ за кождое дерево со пчолами будеть винен платити по две копе
грошей, а за выробленое без пчолъ - копу грошей, за кремъ - полъкопы грошей. А хто бы
кгвалтовне, умыслне вытискаючи кого з кгрунту або з уходовъ звечныхъ альбо тежъ
злодейскимъ обычаемъ дерево бортное очер або зжогъ, або знамена вырубал, або огнемъ
выжогъ, а то бы на него переведено, тогды маеть тому пану, чые дерево, так платить: за
борть со пчолами неподбираными - три рубли грошей; за дерево бортное, где первей
пчолы были, хотя без пчолъ, зопсованое, - по две копе грошей; за дерево, на борть
выробленое, где еще пчолы не были - копу грошей, а за кремъ без борти, иле ихъ сказилъ -
за кождый по полкопы грошей.
Артыкулъ 14.
Цена пчоламъ.
Хто бы кому пчолы выдралъ неподлажоные, а дерева не сказилъ, тогды повиненъ будеть
за каждые таковые пчолы заплатити две копе грошей. Хто бы кому в дому альбо в пасеце,
албо в лесе на дереве з улья або с кореника поставеного пчолы выдрал альбо з ульем взял,
а дошли бы его копою альбо якою просокою, тогды маеть заплатити три рубли грошей.
Окромъ если бы кого з лицомъ поймано, такового мають сказати, яко злодея, на горло. А
хто бы свепет в чыемъ лесе умыслне порубалъ и медъ выбралъ, тотъ маеть за то шесть
рублей грошей заплатити.
Артыкулъ 15.
О порубанье гаю.
Теж хто бы кому у гаехъ, борехъ, пущахъ, лесехъ которую шкоду в порубанью дерева
кгвалтовне учинил, если шляхтичь шляхтичу, тогды за то маеть заплатити кгвалту
дванадцать рублей грошей, а дерево порубаное ценою, нижей описаною, заплатить. А
если мужикъ шляхтичу кгвалтомъ дерево порубаетъ, тотъ вины шесть рублей грошей, а
дерево ценою виненъ будет заплатити. Пакли бы мужикъ мужику дерево кгвалтовне
порубал, тогды кгвалту три рубли грошей заплатити, а шкоду оправити повинен будеть. А
где бы хто кому злодейскимъ обычаемъ дерево на чыемъ кгрунте порубалъ, а его бы з
лицемъ з деревомъ поймано, тотъ маеть окупити горло свое водлугъ стану своего. А если
ж бы з лицомъ не поймано, а лице бъ было у него найдено, тогды за то вину злодейскую
три рубли грошей и к тому дерево порубаное маеть заплатити. А цена або заплата за
дерево, такъ кгвалтомъ, яко и злодействомъ порубаное, маеть быти таковая за кождое
Статут Великого княжества Литовского 1588 года [Электрон. ресурс]
Подг. О.Лицкевич. - Мн., 2002-2003.
http://starbel.narod.ru/statut1588.htm
дерево, а напередъ меновите: за дубъ на ванчосъ и клепъки годный - копу грошей; за
берестъ, вяз и ясень на попелъ годное, за кождое таковое - по осми грошей; за сосну,
которая бы ся годила на цамъръ - полъкопы грошей; за иншое дерево якого кольвекъ
рожаю на будованье, на избу, на клеть годное - по шести грошей; за протесъ великий -
дванадъцать грошей; за такое, што ся зыйдеть на жеръдь озередную, на колье и на
оглоблю - по тры грошы. А которое дерево толко на дрыва або на хворостъ будеть годно,
ино тежъ за возъ по два грошы.
Артыкулъ 16.
О покраденье саду.
Тежъ хто бы шляхътичу садъ овощовый, пры дворе стоячый, кгвалтовне потресъ,
пощыпалъ, а на него бы тотъ кгвалтъ слушне былъ переведенъ, тотъ маеть заплатити
дванадъцат рублей грошей. А покрадет ли, тогды ускожоному за доводомъ маеть быти
заплачоно шесть копъ грошей. А того мають доводить врядники або тивунове, звлаща в
небытности панъ [так!] своихъ. А если бы хто в саду дерево прищепеное кгвалтовне або
таемнымъ обычаемъ порубалъ, або щепъ выкопавшы в саду взялъ, тотъ маеть кгвалтъ
заплатити дванадъцать рублей грошей. А за дерево порубаное або выкопаное - тры рубли
грошей. А хто бы на чыемъ кгрунте у поли овоцъ який в загороде пощыпалъ або потресъ,
тогды за то вины маеть заплатити тры рубли грошей.
Артыкулъ 17.
О пожарохъ у пущахъ и лесехъ.
Тежъ обачывшы есмо в томъ шкоду земъскую, ижъ которые, яко ся одны з другими у
суседъстве маючы васнь межы собою, такъ тежъ люди перееждчые у пущахъ на станехъ
своихъ и пастухи, пасучы кони и быдло в пущахъ, пожаръ от становъ своихъ пущають, а
тымъ дереву борътному, пчоламъ, зверу и птахом шкоду великую чынять, уставуемъ: на
таковыхъ, хто бы умысльне з вазни одинъ противъ другому у пущы, у борехъ, гаехъ,
лесехъ, дубровахъ огнемъ пожаръ пустилъ и шкоду в попаленью дерева почынилъ, тогды
таковый, за доводомъ слушнымъ правънымъ шкоду, огнемъ в дереве учыненую, з
маетности своее платити будеть повинен. А если бы хто неумыслне, прачучы новину або
сеножати, або до дерева борътного, озеръ, сеножатей ходечы, або пастухи, пасучы быдло,
або роботы лесные справуючы, або в ловехъ будучы, неопатрностью своею або з якое
иное пригоды пожаръ пустилъ, таковый, отпрысегнувшысе, же то неумысльне уделалъ, от
того воленъ быти маеть. А если бы присегнути не хотелъ, тогды шкоду, огнемъ учиненую,
платити виненъ будеть.
Артыкулъ 18.
О томъ, абы нихто на чужихъ кгрунтехъ полевати не смелъ.
Кгды жь мысливцы людямъ звыкли великие шкоды чинити, топчучи збож[ь]я, для того
уставуемъ, абы, почавшы от свята семое суботы аж до зебранья с пол[ь] всякого збож[ь]я
на чужых кгрунътех нихто полевати не смел. А хто бы, в том часе полюючы, кому шкоду
учынилъ, тогды таковый ушкожоному вины тры копы грошей заплатити и шкоду
нагородити повиненъ будеть.
Статут Великого княжества Литовского 1588 года [Электрон. ресурс]
Подг. О.Лицкевич. - Мн., 2002-2003.
http://starbel.narod.ru/statut1588.htm
Розделъ одинадъцатый: О кгвалтехъ, о боехъ,
о головщызнахъ шляхетскихъ.
Артыкулъ 1.
Хто бы на чый домъ або на господу умысльне наехалъ, хотечы его забити.
Уставуемъ: хто бы на чый домъ шляхетский не только на самый дворъ, але и на гумно або
на дворецъ, где быдло и иншое господаръство домовое бываеть ховано, кгвалтомъ
умысльне наехавшы або нашедъшы, а в томъ дому кого кольвекъ забил и тымъ покой
посполитый възрушылъ, а то бы на него было слушнымъ доводомъ водлугъ сего статуту
переведено, тотъ горло тратить, а не толко самъ, але и помочники такового, хто з нимъ на
томъ кгвалте будеть, также горъломъ карани будуть, звлаща, если бы тые помочники от
того отпрысегнутися не хотели, яко о томъ нижей в семъ же розделе, артыкуле втором
описано естъ. А головщизна водлугъ стану совито зъ именья того кгвалтовника и тежъ
шкоды если бы которые на томъ кгвалте вчинены детямъ або близскимъ забитого, з
навезкою плачоны быти мають. А если бы никого не забилъ, толко ранилъ, таковый за
доводомъ слушнымъ самъ толко горъло тратить, а помочники его у вежы на дне, на
головники постановлено[й] [в оригинале: “постановленоз” – О.Л.], рокъ и шесть недель
седети повинъни будуть, а навезка водлугъ стану и шкоды, которые бы ся пры томъ
кгвалте стали, зъ именья того самого кгвалтовника з навезкою плачоны быти мають. А
естли бы кгвалтомъ наехалъ або нашолъ, а никого не ранилъ, ани забилъ, а знаки предъсе
кгвалту або шкоду якую учынилъ, тогды толко за кгвалтъ повиненъ будеть платити
дванадъцать рублей грошей и шкоду з навезкою оправити за слушнымъ доводомъ, а
горъла для нахоженья кгвалту не тратить. Ведъ же предъсе за тую вину кгвалтовную, кгды
то на него от стороны жалобное доведено будеть, маеть в замку або в дворе нашомъ
судовомъ того жъ повету дванадъцать недель также и с помочниками своими седети
заразомъ скоро по сказанью врядовымъ. Ведъ же слуги пановъ своихъ за помочники
розумены быти не могуть. По тому жъ естли бы хто кому в месте, або в дорогу едучы, на
господу кгвалтовъне нашолъ а кого забилъ або ранилъ, або шкоду якую учынилъ, маеть
быти сужонъ и сказыванъ тым же обычаемъ, яко вышей в семъ арътыкуле о кгвалте дому
шляхетъского естъ описано. И кгды до росправы судовное в такой речы прыйдеть, а на
тотъ одинъ рокъ помочники его не могли бы ку праву прытягнены быти, тогды обвиненый
в головахъ кгвалтовникъ, не вымовляючысе небытностью помочниковъ своихъ, виненъ
будеть усправедливитисе, а жалобной стороне волно будеть и потомъ с помочниками его
правне о то чынити.
Артыкулъ 2.
О доводъ кгвалту, якъ жалобникъ мает осветчати, ожаловати.
Кгды бы се кому таковый кгвалтъ, яко вышей описано, от кого сталъ и на кгвалте томъ
забитый былъ, тогды сторона, в том ображоная, скоро по оном кгвалте и того ж часу
кгвалтъ и того забитого маеть оповедати и оказати околичнымъ суседомъ своимъ, а в
небытности ихъ, ино врядникомъ ихъ, шляхте, людем добрымъ, а в недостатку шляхты,
ино такъже околичнымъ суседомъ, хотя и не шляхте, толко людемъ добрымъ, веры
годным, маеть оказати, а потомъ жаловати на враде нашом кгродскомъ судовомъ того
повету, в которомъ се што станеть, и возного взяти и такъже ему оказати кгвалтъ и
забитого. А тотъ кгвалтъ и жалобу в книги врядовые кгродские записати и к тому, трупъ
тот на вряд привезши, тому вряду, кого з нихъ на местцу судовом зостанеть, оказати. А по
оказанью вряду вжо тотъ трупъ, не ждучы конъченья права, яко то передъ тым чынено,
можетъ быти похованъ. А то горачому учынъку и каранью, о нем описаному, шкодити не
Статут Великого княжества Литовского 1588 года [Электрон. ресурс]
Подг. О.Лицкевич. - Мн., 2002-2003.
http://starbel.narod.ru/statut1588.htm
маеть, и у права, если бы ся ку оному кгвалту и забитому обжалованый не зналъ, тогды
вжо тотъ жалобникъ близший будеть суседы околичными, ставечи их очевисте у права, и
теж выписомъ сознанья возного на него доводити и при том доводе самотреть з
шляхтичами, собе ровными, на томъ кгвалте присегнути. Если ж бы не могъ мети на тот
часъ шляхтичовъ з собою ку присязе, тогды самъ, и з жо[но]ю своею, и з детми
дорослыми, а не будет ли мети детей дорослых, ино и з жоною своею, и з слугами, и
челед[ь]ю своею домовою самъпятъ маеть того кгвалтовника поприсегнути. А если бы
господаръ домовый забитъ былъ, тогды жона его и дети, а не будет ли жоны або детей,
тогды близские такимъ же порадкомъ и доводомъ того кгвалту зыскивати и доводити
будуть. А по такомъ доводе тотъ кгвалтовникъ и помочники его караны будуть водлугъ
арътыкулу перъвшого, в сем же розделе о томъ постановеного. А пакли бы помочники на
горачомъ учинку не были пойманы, але, обвинеными в томъ будучы, до того не зналися,
тогды не згола, але присегою отведшыся, волни быти мають. А если бы не прысегнули,
тогды горъломъ карани будуть, яко и самъ кгвалтовникъ. А естли бы кгвалътомъ на домъ
наехалъ, а не забилъ, толко ранилъ, тогды также маеть тотъ кгвалтъ оповедати и раны
оказати околичънымъ суседомъ и на вряде кгродъскомъ оповедати и записати, яко вышей
описано. И при такомъ доводе оного кгвалту и ранъного маеть такового кгвалтовника
самъсемъ, з людьми добрыми, шляхтою поприсягнути. А кгды прысягнеть, таковый
кгвалтовникъ и помочники его мають быти карани, яко естъ у вышъшомъ арътыкуле
описано, а навезка водлугъ стану и шкоды за доводомъ з навезкою зъ именья его, а в
недостатку именья лежачого з маетности его рухомое плачоны будут. Нижли естли бы
шести светъковъ сполъна не мелъ, тогды з двема шляхътичами, людьми сторонъными, або
в недостатку шляхъты з домовыми, яко вышей доложоно, одно жъ вжо самотреть
присегнути маеть, а кгвалтовникъ за таковымъ незуполънымъ доводомъ горла не тратить,
одно кгвалту дванадъцать рублей грошей, а навезку водле стану и шкоду за доводомъ з
навезкою маеть платити. А за вину двадъцать чотыри недели у вежы на дне у везеньи
седети. Пакли бы и на томъ доводе своемъ усталъ, тогды толко самъ ранъный на ранахъ
своихъ маеть присегнути, которому по прысязе его навезка будеть сказана, а кгвалтъ и
шкоды не мають быти сказываны. А где бы на ономъ кгвалте в дому никого не забито, ани
ранено, толко одно шкода вчинена, таковый кгвалтъ также маеть быти осветъчонъ, яко
вышей описано, а при томъ доводе у права на кгвалтовника маеть тымъ обычаемъ на
кгвалте и на шкодахъ самотреть поприсегнути. Не будет ли мети шляхъты з собою ку
прысязе, тогды з домовыми своими, яко вышей в сем арътыкуле описано, самъчетверътъ
можеть прысегнути, хотя и з нешляхътою. А кгды прысягнеть, маеть быти кгвалт плачонъ
дванадъцать рублей грошей и шкоды за доводомъ з навезкою оправити, а горъла не
тратить, одно жъ предъсе за вину того кгвалту у везеньи дванадъцать недель седети маеть.
Артыкулъ 3.
О кгвалтъ костеловъ божихъ вшелякого набоженъства хрестиянъского.
Тежъ если бы хто, пришедши кгвалтовне на костелъ божий якого колвекъ набоженъства
хрестиянъского, або тежъ на цвинтару, въ школе або в капланьскомъ, поповскомъ,
казнодейскомъ дому кого забилъ або ранилъ, а тые бы раны значные и шкодливые были,
тогды под таковым же способомъ и доводом маеть быти каранъ, яко вышей о
[к]гвалтовникахъ домовъ шляхетскихъ написано. А если бы толко ударилъ, а раны не
было, тогды совито кгвалт маеть платити, то есть двадцать и чотыри рубли грошей, и
оного удареного навезати и то все заплативъши еще дванадцать недель маеть у вязенью
седети в томъ повете, где ся станет.
Статут Великого княжества Литовского 1588 года [Электрон. ресурс]
Подг. О.Лицкевич. - Мн., 2002-2003.
http://starbel.narod.ru/statut1588.htm
Артыкулъ 4.
О кгвалтовнику и мужобойцы, который, забивъшы, зъ земъли утечеть.
Тежь если бы таковый кгвалтовникъ, забивъши кого в дому, в господе и на улицы, на
дорозе и где ж кольвекъ, а будь заразомъ по том учынъку не будучи позванъ або и после
позваня, такъ заочного, яко и очевистого, не становечисе на рокъ, за позвы припалый ку
росправе, прочь с того панъства нашого, великого князства, утекъ або хотя бы с паньства
нашого не утекъ, але бы се без причынъ слушъныхъ правныхъ ку праву за позвы не
становилъ, тогды таковый самъ от вряду нашого маеть быти отосланъ на выволанье до
нас, г[о]с[по]д[а]ря, а за головщизну навезки, шкоды, в позве описаные, врядъ, не
откладаючи того на далшый часъ, але заразомъ стороне жалобной за доводомъ позву и
року и за показан[ь]емъ толко оповеданья суседомъ околичнымъ, и на вряде учыненого,
не слухаючы иншых далшыхъ доводовъ, одно для того нестанья обвиненого до сконченья
права скутечного маеть дати увязанье в ыменье такого обвиненого. А где бы именье за
головщину и за шкоду не стояло, однако жъ тое именье маетъ быти в той головщизне и в
шкодахъ подано детемъ того забитого або кревнымъ. А тотъ обвинены[й] и выволаный
всхочет ли се потомъ в томъ объжалованью за кглейтомъ нашымъ справовати, тогды
маеть се в томъ заховати водлугъ артыкулу трыдцатого в розделе четвертомъ. И на праве
естли бы се с того обвиненья выправилъ, тогды жалобникъ виненъ будеть ему именье его,
в которое былъ от вряду за нестан[ь]емъ его увязанъ, поступити, а шкоды тые, которые бы
за таковымъ увезаньемъ обвиненому в ыменью его сталися, и за омешканье роботы с
права за слушнымъ доводомъ тотъ, хто обжаловалъ былъ, платити повиненъ будеть. Ведъ
же такий обвиненый або выволаный маеть се в томъ чути и того се справовати надалей от
выволанья до году и шести недель. А такъ вжо коли очывисте стороны стануть, которой
стороне доводъ або отводъ врядъ чынити вскажеть кгрунтовне водлугъ права наконецъ,
всякими поступками правными доводъ албо отводъ чыненъ быти маеть. А естли бы се в
томъ часе до году и шести недель до справы не мелъ и кглейту нашого не бралъ, тогъды
дети або близские забитого вжо тое именье стороны противное держати и вжывати мають
дотыхъместъ, поки выволаного дети або кревные тую суму пенезей, от вряду имъ водлугъ
позву сказаную, заплатять. А онъ самъ вжо вечнымъ выволанцом зостати маеть, нижли
таковые дети або кревные мають тую суму пенезей откладати, которые того мужобойства
не помагали. Естли жъ бы по выволанью тотъ кгвалтовникъ або забойца налезенъ былъ в
томъ паньстве нашомъ, тогды на томъ враде, где будеть постигненъ, маеть быти каранъ
яко кгвалтовникъ. А не будет ли хто постигалъ або фолдровалъ, тогды вряд нашъ, маючы
певную ведомость о таковомъ выволаномъ мужобойцы або кгвалтовнику, маеть там же на
томъ вряде своемъ, поймавшы, скарати, яко о томъ вышей описано. А в томъ часе, ним
пойманъ и на вряде каранъ будеть, трафит ли ся кому колвекъ его забити, за такового
выволанца забитье нихто головщизны платити не будеть повиненъ.
Артыкулъ 5.
О способе выволанья, якими словы маеть быти чынено, и о хованью ката на вряде
кгродскомъ.
Кгды бы хто с подъданыхъ нашых народу шляхетъского якого кольвекъ стану, от
найвышъшого до нанижшого, за выступокъ и непослушеньство свое впалъ в такую вину
водлугъ сего права посполитого, за которую выволанъ быти маеть, тогды выволанье маеть
быти на листехъ нашихъ выволаныхъ ознаймено и черезъ возныхъ на местъцахъ, тому
водлугъ науки сего статуту пристойныхъ, чинено и оголошано тыми словы: “Кгды ж тотъ,
именемъ .н[айме]., учинивъшы такий и такий учынокъ противко пану богу, зверхности
г[о]с[по]д[а]ръской и праву посполитому, а будучы позваный, не становилъся,
Статут Великого княжества Литовского 1588 года [Электрон. ресурс]
Подг. О.Лицкевич. - Мн., 2002-2003.
http://starbel.narod.ru/statut1588.htm
зверъхности его королевъское м[и]л[о]сти, вряду и права послушонъ быти не хотелъ, ани
се становилъ на року усправедливенью поводовой стороне, в чомъ его обвинила, с тых
причинъ его королевъская м[и]л[о]сть того .н[айме]., яко непослушного выволываеть с
панствъ своих, зъ сполъку обцованья подъданыхъ своихъ, зо всих земль своихъ такъ, ижъ
нихто з нимъ обцованья мети, ани его в дому своемъ переховывати не маеть, и с права
того, с которого ся вси подъданые его королевское м[и]л[о]сти веселят, онъ веселитисе не
маеть, ани его уживати до того часу, ажъ водле права посполитого, з ласки его
королевское м[и]л[о]сти а за усправедливеньемъ се стороне его противной, засе до сполку
и товарыства подъданыхъ его королевъское м[и]л[о]сти и до права посполитого
приверненъ будеть. А в томъ часе, покуль выволанцомъ естъ, жона его маеть быти
розумена яко вдова, дети его — сиротами, а домъ его пустый”. В томъ тежъ повинъность
кождого вряду судового кгродъского обовезуемъ, звлаща где права майдебуръского нетъ,
ижъ мають и повинни будуть на врядехъ своихъ мистра, то естъ ката, ку каранью злыхъ
своволныхъ людей, которые бы правомъ посполитымъ на смерть поконаны або на муку
выдани были, жебы сторона поводовая, не ищучы и не набываючи ката зъ иншыхъ местъ,
могла его зараз, на том же вряде, ку выконанью сказанья врядового мети. И естли бы
который врядъ кгродъский в томъ недбалый былъ а ката пры своемъ вряде не мелъ, тогды
часу потребы не сторона, але врядъ своимъ накладомъ будеть виненъ его, откуль можеть,
набывати безъ жадное проволоки, а сторона толко то, яко давный обычай естъ, на местъцу
кату платити винна будеть.
Артыкулъ 6.
О заморъдованье мужа або жоны на смерть промежку нихъ самыхъ.
Тежъ кгды бы з ненависти и немилости на обедве стороне такъ мужъ, яко и жона, будучи
в ростырку, зъ якихъ колвекъ причынъ одинъ другого приправилъ о горло, замордовалъ
або струлъ, таковое окрутеньство и замордованье дети або кревные того замордованого
мають суседомъ околичнымъ того жъ часу, а потомъ и вряду оповедати и ожаловати, и
инъстыкговати або фолдровати на кождого такового мордера. И при выведанью
достаточном у суседовъ околичныхъ о зломъ якомъ мешканью и незгоде ихъ и при
оказанью причынъ а знаковъ якихъ слушныхъ того мордерства або трутизны тые дети або
близские, которые будут инъстыкговать, близшые будуть самотрети [так!] зъ суседы
околичными, шляхтою, а в недостатку шляхты — з слугами, с челяд[ь]ю домовою
самопятый присегнути. И по таковомъ доводе обвиненый горломъ будеть каранъ. А хотя
бы сынове або кревные не хотели фолдровати, тогды врядъ нашъ з местца своего маеть
того особливе перестерегати и с пилностью около того выведатисе, и в околичныхъ
суседовъ близскихъ о того замордованого опытъ чынити и, обравши семи шляхтичовъ, ку
присязе привести, которые подъ присегою о томъ справедливе мають передъ врадом
поведити [вариант, переносное слово в конце столбца 401 на столбец 402: “поведати” –
О.Л.]. И кгды тая семъ шляхтичовъ о того замордованого на кого присягнуть, таковый
мордеръ безъ литости маеть быти каранъ горломъ тымъ способомъ, яко бы отца або матку
забилъ. А где бы се в такой справе трафило, ижъбы сторона жалобная на доводе, верху
менованом, устала, або за выведан[ь]емъ врядовымъ шляхта околичная присегнути не
хотела, а предсе бы была ведомость и подойзренье злого ихъ мешканья в малженстве, и то
бы суседи околичные посветчали, тогды однакъ тая особа обвиненая не згола маеть быти
волна, але повинна будет с такъ же много особами, яко и жалобной стороне вышей
описано, от того учынку отприсягнутися.
Статут Великого княжества Литовского 1588 года [Электрон. ресурс]
Подг. О.Лицкевич. - Мн., 2002-2003.
http://starbel.narod.ru/statut1588.htm
Артыкулъ 7.
О забойцахъ отца або матки, такъже о забитье дитяти через родича.
Уставуемъ: кгды бы сынъ або дочка отца або матку свою умысльне, зъ якое запаметалости
забилъ и якимъ колвекъ обычаем родича своего о горло приправилъ, тогды таковый сынъ
або девка, которая причиною своею о горло родича своего приправить, не толко горломъ
маеть быти каран, але и почтивость, и вси именья, и мае[т]ность тратить на иншую
братью, сестры або близкихъ своихъ, звлаща того учинку невинъныхъ. А такою
карностью, смертью ганебною маеть каранъ быти: по рынку возечи, клещами тело [в
оригинале: “тсло” – О.Л.] торгати, а потомъ в мехъ скуреный всадивши, до него пса, кура,
ужа, котку и тое все посполу в мехъ всадивши, и зашить и где наглубей до воды утопити.
Тым же теж обычаем и помочники его, которыхъ онъ поволаеть або на нихъ правомъ
переведено будет, мають быти карани. А если бы се трафило родичом дитя свое забити не
с пригоды, ани за вину, але умысльне, тогды таковый отецъ и матка мають быти карани за
тое годъ и шесть недель на замку нашомъ седети у вежы. А выседевши годъ и шесть
недель, маеть еще до году чотыри кроть при церкви, при костеле якого набоженства
християньского будеть покутовати и вызнавати явный грехъ свой перед всими людми
собранья християнъского. А въ такой речи вряд кгродский виненъ инстыкговать и за
выведаньемъ певнымъ винъныхъ такъ карати.
Артыкулъ 8.
Если бы хто брата або сестру забилъ.
Уставуемъ: хто бы брата або сестру забилъ в надею имен[ь]я або маетности рухомое, або
якою кольвекъ направою о горло приправил, а то бы на него доводомъ слушнымъ
переведено было, тогды таковый маеть быти каранъ горломъ. А тое именье, которое бы на
него и на дети его прийти мело, спадываеть на иншую братью або на сестры, або тэжъ на
стрыев и близкихъ в томъ дому тым же тэжъ обычаемъ. Естли бы зять забилъ шурина
своего, тогды жона его, сестра того забитого, дети ее до именей по брате своемъ не маеть
мети ничого. А тотъ, хто забилъ, маеть горлом каранъ быти. Тое ж право и на тыхъ, хто бы
кровного своего забил, хотя и далекого в роду.
Артыкулъ 9.
Который бы слуга забилъ або ранилъ пана своего.
Тежъ уставуемъ: естли бы который слуга, вземши перед себе злый умыслъ, пана своего
забилъ або ранилъ, таковый маеть срокго горломъ каранъ быти яко здрадца
четвертованьемъ. А естли бы не забилъ, ани ранилъ, одно брони противъ пану своему
добылъ, таковый руку тратить.
Артыкулъ 10.
О звадахъ.
Тежъ коли бы ся хто с кимъ звадилъ, а в оной зваде обадва се ранили, а одинъ бы с тыхъ
позвалъ до права, а светковъ бы межи собою не мели, хто бы мелъ межи ними розознать, а
одинъ бы другому не допустилъ на присегу, а обадва бы се брали ку присязе, тогды судьи
мають имъ сказати жеребей кинути. А чый се жеребей напередъ выйметь, тотъ маеть
присегнути на ранахъ своихъ и на початку звады и бою. А коли оный присягнеть, тогды
тотъ тому, хто присягнеть, маеть за раны платити якого стану будеть. А естли шляхтича
будеть навязывати, тогды еще в замку або в дворе нашомъ шесть недель седети. А где бы